Dewleta terorîste, rejîma faşîste û hukumato bêheq, endî ebi axu miletê ma qirkenê.
Îtade tabî hukumat hem terorîst o, hem faşîsto hem kî bêheq o. Raştîye de pêro jû yê.
Sifetê nî hukumatî na yê.
Tertelê Çukurca kamîya na hukumatî tam kerde araze. Kes endî gune faşîstîya û bêheqîya na hukumatî ra sik û guman mekero.
Na dewlete însanî çitur yenê vêsnayene hora rewra misnayî bî ma. Sîvas de na dewlete alevî vêsnayî. Teyna sarê ma na dewlete tam nasnêkeno. Namê xo çi beno bibo, îdarekarê na dewlete pêro jû bî û jû yê.
Tayîne seweta Atatürk kist, taye kî nika seweta Fetullah Gülenî kisenê.
Îdarekaranê virenan belka teyna seweta tirk û tirkîye kist, îdarekarê nikayenî seweta tirk, tirkîye û bi namê mislimanîye kisenê.
Labelê hukumatê AKaPe her het ra hukuamtê virenan ra tenena jede çî muso. Heto jû ra demokrasîye xo fekra waro nêdano, heto bîn ra şîmşero gonin xo dest ra waro nêdano.
Kotî ra nîyadanê nîyadê, destê na hukumatî gonî derê. Tayê însanî xorê çîyode bin simenê, hama AKaPe gonî simena. Gonya kurdan.
Cendegan vêsnayene, cendegan rê ejat kerdene, sare û gosê gerîllayan cirakerdene, mexsusê na dewlete û hukumatanê na dewlete yê.
Hem ‘demokrasîya’ xo hem kî ‘îtîqatê’ nînan qetilkarî yê.
Yê nînan di çîyê xo estê: Jû cizdano kewo, jû vijdano gonin o.
Poştya xo qayîma. Hukumatê rojavanî guretê lewê xo, tertelê kurdan ra nêtersena. Ebi nî dostanê xora pîya osmanizî tertelê ermenîyan kî kerd. Na rîwal ra ewro kî pîya hereket kenê, ayvê jûvînî danê we.
Tertelo bîn kî sîyasî yo û kistene hebe dem cena.
Îşaretê na tertelî 2009 de weçînîtîs ra tepîya ame dayene. Waxto ke kurdî weçînîtîsê mahallî de kewtî ser, Erdoğan û mafya xo yê huquqî bî harî.
O waxt ra nat ebi hazaran însanî, leto jede kurdî, cerayî zerre û hona hepisxanan derê. A wa na wa her roz bi desan û seyan mordemê sîyasî erjînê hepis.
Însanê tirkî yê ke na dewlet û hukumatê gonwerî rexnê kenê, cerînê zerre erjînê hepis. Ebi naye dewleta tirkî wazena kurdan teyna verdo û îzole bikero.
No tertelo sîyasî, tertelê bînî ra tenena hîra wo û bi tehlîke wo. Çike no tertelo sîyasî tertelê bînî rê binge keno amade.
Dormê kurdan cerîno, însanê tirkî yê bi rumetî na rîwalra yenê hepis kerdene.