Wekîlê HDPe Turgut Oker ciresna ke êy ravêreyeya ke faşîzm wazeno serwerîya xo awan bikerî ra vîyarênî û wina verdewam kerd: “Dîktatorekî semedê ke pergalê xo bidomno çende xirabî estî se keno. Tirkîya goreyê 35 serre verê hetê despotî de hîna zaf aver şîya. Labelê çîyo ke hîna xirab o zî komel no despotî qebul kerdo. Tirkîya her ke şona bena zîndanê akerde û wazenî şar bi zilm terbîye bikerî. Labelê no heta peynî wina nêşono.”
Ma nêyî şinasnenî
Oker dergeyîya qalîkerdişê xo de bal ant ser dişmentî û wina domna: “Tirkîya elewîyan sey dişmen vînena. Bi serwerîya DAIŞe de elewîyan ra heqê cuyayîşî nîno naskerdiş. Hezey ke Rojhilato Mîyanên de zî aseno ke DAIŞ dijî elewîyan nêzdbîyayîşekî çinîker xo rê esas gêno. Bi hezar serran o ke nêy erdan de elewîtî sey zindiktî û kafirtî ame dîyîş û qetlê înan her tim awayo bîyaye ame dîyîş. Na babete sero ame dîyîş ke tay kesî semedê qirkerdişê elewîyan fitwa day û no dayîş encamê giran vet werte. Ma no zîhnîyetî Gurgum, Çorum û Sêwazî ra nas kenî. Wexto ke yeno vatiş ke ‘Êy ke nêy kafiran qetil bikî, şonî cinet, aye wext des hezar merdim dekewno rêzî. No çîyo ke ercan nîyo. Lazim o elewîtî zîhnîyetê evdî red bikera, dijî xapênayîş û kanperestî têkoşîn bida.”
Lazim o nêtersî
Oker dîyar kerd ke bi qirkerdişan çar hetê welatî ra cenazeyê elewîyan şîy û qalîkerdişê xo wina peynî kerd: “Qirkerdişê Pirsûs û Enqereye de êy ke amey qetilkerdiş zafê înan elewî, averperest û HDPij bî. Dîlek Dogan ke Sariyerî de hetê polîsî ra amey kiştiş zî elewî bî. Tirkîyaye de elewîyî yenî qirkerdiş. Qirkerdişê ke DAIŞ Tirkîyaye de kena AKPe ra cîya nîya. Lazim o her kes nêy raştîyan biveyno. Yezîd barbarekî ke tena Kerbelaye de mendo nîyo, Erdogan zî rayîrê Yezîdî de yo. Erdogan bi kerdişê xo nika ra çende ray kerdişê ke aye wext Yezîdî kerdo, vîyarnayo. No semedî ra ez bi wesîleya aşma Muharremî veng dana elewîyan; wa elewî tena 12 roje nê, 365 roje sey Hz. Huseyînî dijî Yezîdî xover bidî.”
ZEYNEP KURAY/ANF/STENBOL