Roja şemîye seba protestokerdişê Zîrweyê G20 sûka Almanya Hambûrg de nûmayîşeke gird virazîya. Kurdan zî bi slogananê “Ocalanî rê azadî, Kurdistanî rê Haştî” protestoyan rê pêşengî kerd û deqê xo eşt nûmayîşan. Heto bîn ra Erdogan ke netîceyo ke Zîrweyê G20î ra pawit nêgirewt, bi lez û bez Almanya terk kerd. Seba Erdoganî merasîba oxirkerdişî nêvirazîya û Erdogan tewrê fotografê G20î nêbi.
200 kesî tepêşîyay
Çalakîyê protestoyî ke bi “Kombîyayîşê Alternatîf” verîya çend rojan destpê kerdî, roja Şeme bi tewrbîyayîşê bi des hezaran kesî dewam kerdî. Polîsan destûr nêda ke kesê ke sûkanê cîya ra şî Hambûrg, tewrê nûmayîşî bibê û bi seyan kesan tepişt. Herzewbîn xeylê kesî zî bî dirbetin.
Ser mudaxaleyê polîsan, gencan zî ver navendê sûk Altona St. Paûlî de barîkat ronay. Herzewbîn qezayê Hambûrg Sternschanze de zî gencan barîkat ronay û destûr nêday ke polîs mudaxale bikero. Goreyê zanayîşê ke polîsê Hambûrg day, nezdîyê 200 polîs bî dirbetin û 200 ra vêşî nûmayîşkarî amey tepiştiş. Seba Zîrweyê G20 bi des hezaran polîs amebi wezîfedarkerdiş.
‘Kurdî bi reng û waştenanê xo tewr bî’
Nûmayîşo tewr gird roja Şeme bi tewrbîyayîşê 70 sazgeh û dezgehanê Elmanya virazîya. Ser nameyê Kurdan zî NAV-DEM tewr bî. Bi hezaran Kurdê ke Almanya de ciwîyenê ser vengdayîşê NAV-DEM tewrê nûmayîş bî. Şaranê bîn zî alê YPG/YPJ hewaday. Meşa ke ver îstasyonê trên yê Hambûrg de destpê kerd, û St. Paûlî de qedîya.
Kurdistanijî zî bi pankart û slogananê xo yê zey “Abdullah Ocalanî rê azadî, Kurdistanî rê Haştî” tewrê meşî bî. Kurdistanijan bi slogan û dowîzan hayr antî Şoreşa Rojawa û tecrîdê Ocalanî ser.
HAMBÛRG