Her çiqas ke qetilbîyayîşê Serekê Baroya Amedî yo kehen Tahîr Elçîyî ser ra 20 aşmî derbaz bîyî zî heta nika ne kerdox û ne zî tehqîqat de averşîyayîşêk esto. Tehqîqat de heta nika 3 dozgerî bedilîyayî, labelê dîmenê ke hedîseyî bivejî orte, nêameyî dîyayîş. Babete ser o Serekê Baroya Amedî Ahmet Ozmenî qisey kerd.
Ozmenî va ‘Elçîyî xeylê cînayetan roşn ked, labelê çi heyf ke o bi xo bî qurbanê cînayeto ke kerdoxê ci dîyar nîyo’ û wina dewam kerd: “Ma sey Baroya Amedî sere ra nata tehqîqatî şopnenî û ma her hewte roja îne vernîya Edlîyeya Amedî de edaletî qîrenî. ”
Temamê dosya nêdîyayo
Ozmenî da zanayîş ke ‘ma her tim vanî ke dosyaya Tahîr Elçîyî bi hawayo lez û bitesîr nîna meşnayîş’ û wina va: “Temamê dosyaya tehqîqatî hetê dozgerî ra nêdîya ma. Her çiqas ke pêvînayîşanê ma de Wezîrîya Edaletî soze daybî ke do bi hawayo koordîneyin dosya bêra meşnayîş zî, heta nika no het de gamî nêerzîyayî. Cînayetî ra dima heme delîlî cayê hedîseyî ra nêameyî arêdayîş. Polîsê ke şikin bîy sey şahid ameyî goşdarîkerdiş. Reyna her çiqas ke roja hedîseyî de polîsêk ewja de bî, reyna zî belgeyê cayê hedîseyî îmze nêkerdbî, dozgerî sey şahid îfadeyê ci girewt.”
Ozmenî wina va: “Her çiqas ke ma ê dîmenan dozgerî ra va, reyna zî ma hema temaşe nêkerdo. Hedîse ser o 20 aşmî derbaz bîyî, labelê hema zî Dezgeyê Tibê Edlî nê dîmenan seba ke ma temaşe bikerî, nêaçarnayo. Her tim mehne nîşan dano. Dîmenanê polîsan de parçeyêko 17 sanîyeyî vînîbîyaye yo. ”
DÎHABER/AMED