Çehar rojiyo ke dirbetinê ke 11 rojiyo taxa Cûdî yê Cizîr de yê ra xeber nîna giroten.
Qûwetanê YPS, bi jû aşkerekerdiş hayr antî dirbetinê ke bi rojano Cizîr de, jew bodrim de yê ser. Aşkerekerdiş de vajiya ke, beno ke dirbetinî hetê qûwetanê dewlet ameyê înfaz kerdin.
Aşkerekerdiş de vajiya ke, çormeyê keyeyo bi homarê 23 ke taxa Cûdî yê Cizîr de yo de qûwetê YPS çinyê û pirodayişî nêqewimenê. YPS vist vîrî ke, no keyeyo ke 10 rojiyo dirbetinî miyan de yê hetê qûwetanê dewlet hedef yeno giroten û bin gulevornayen de yo.
Qetlîam rê sebeb geyrenê
YPS aşkere kerd ke, xeberê ke derheqê no keye de vejyenê pêrokîn zûrî yê, mîzansenî yê. Xeberê talîmatê cor yê zey ‘Memo’yî, Rozan’î bixelesnê’ zûrî yê. Hewl danê ke qetlîama xo rê sebeb bivînê.
Beno ke dirbetinî înfaz biyê
YPS da zonayene ke, yeno fehmkerdiş ke, qûwetanê dewlet 30ê Çile de vera no keye operasyon ramitî û wina va: “Îxtimalê gird, însanê ma yê sivîl gulevaran kerdî. Çormeyê no keye de pirodayişî çinyê. Êrişê jû hetî yê qûwetanê dewlet estê. YPS aşkere kerd ke, ê serva cipersyayişê heyetanê heqê merdiman û xoser hadre yê. Serva ke raştî bivejyê werte ê dê pêrokîn destegan bidê.
Dewlet manîpulasyon kena
Aşkerekerdişê YPS de vajiya ke, zey her finî, dewlet na babedî de zî manîpulasyon kena, zonayişanê şaş dana civakî. YPS zey nimûne zî sûîqestkarê Sirp da û waşt ke kes, emelê nê zûrîyan nêkero.
Kasrik de xêma xoverdayiş
Heta bîn ra, nûmayişê serva wayirvejyayişê xoverdayena Cizîr zî benê berz. Bi seyan welatijî serva şikinayişê ablûqeya vera Cizîr, Şirnex ra kewtî raya Cizîr. Welatijî ser raya Kasrik de amey vindernayen. Ser nay welatijan xêm ronay û destpa nûmayişa nobed kerdî.
‘Her ca Botan’…
Welatijê ke navendê Şirnex, sûkeka Gundikê Melê û Dergul de manenê, serva şikinayişê ablûqeya Cizîr û girotişê dirbetinan kewtî hereket. Parlamenterê Şirnex Ferhat Encu ra piya bi seyan kes, bi sloganê zey ‘Cizîr tenya niyo’, ‘Her ca Botan, her ca serhewedayen’ hetê Cizîr kewtî ray.
‘Ablûqa şikineme’
Nûmayişkarî bi wesayîtê zirxî, bi TOMA’yan hetê tîmanê hereketê taybet Kasrik de amey manîkerdin. Ser nay Ferhat Encu qisey kerd û ard zon ke, ê dê xoverdayiş ra peyser gam nêerzê û heta ke ablûqeya vera Cizîr wedariyo, xoverdayiş de israr bikerê. Encu va, îradeyê şarê ma ebi nê zextan nîno şikiten, ma dê na ablûqe bişiknê. Peycoy, nûmayişkaran sûkeka Kasrik de xêm ronay û destpa nobeda xoverdayiş kerdî.
DÎHA/ŞIRNEX
Sûr de 15 qûwetê dewlet kişiyay
Qezaya Amed Sûr de, ablûqeya dewlet di aşmî pey xo de virada û roja 64. de ramena. Mavêna YPS Sûr û qûwetanê dewlet de pirodayişî ramenê.
Vizêr zî qûwetanê dewlet bi tanq û bombe eştoxan êrişê taxan kerd. Êrişan de banê welatijan û cayê tarixî hedef amey giroten. Netîceyê cewabdayişê qûwetanê YPS Sûr de, 15 polîs û eskerê dewleta Tirk kişiyay.
AMED