Enstîtuya Cigêrayişanê Sîyasî û Sosyalî ya Diyarbekirî ra bi nameyê “Prosesê Şerî de Desteko Psîko-Sosyal, Nimûneyê Sûrî û Baxleran, Vera Trawma de Muqawemetê Tutan” yewna kitab bi kirdkî vejîya. Kitab, sey parçeyê projeyê "Challenging Trauma of Children in Conflict Zones" ke hetê Sefaretxaneyê Hollanda yê Tirkîya ra ameyo destekkerdiş amade biyo. Seke yeno zanayiş, cayo ke tede şer û pêrodayiş bibo de tutî hem mirenê hem kewenê trawma hem zî benê şahidê trawma. Bawerîya tutan şikîyena û derheqê îstîqbalî de xeyal û hêvîya xo kenê vîndî, netîce de heyatî dir têkilîyêka problemine nanê ro. Seba başkerdişê enê tesîranê negatîfan yê fîzîkî û psîkolojîkî DÎSA bi hemkarîya madî û teknîkî ya gelêk dezgeyan mabeynê kanûnê verîn 2016-kanûnê verîn 2017 de Diyarbekir de sey proje semedê tutanê ke demê şerî de marûzê trawma bîyê yew xebata destekê psîko-sosyalî kerde. Eno kitab hetêk ra raporê ena xebate yo la esas derheqê trawma û xebatanê vera trawma de sey qlawuzî yo. Kitab hîrê beşan ra yeno pê. Beşê yewin de; sey analîzkerdişê xebata destekê psîko-sosyalî çarçewaya termînolojîke dîyar bena. Beşê diyin de, xebata destekê psîko-sosyalî ya seba tutan ameya erjnayiş. Beşê netîceyî de zî, şertê xebata ke ameya kerdiş, çarçewaya prosesê şerî de ameyê erjnayiş û pêşnîyazî vejîyayê meydan. Kitab bi tirkî amade biyo la tercumeyê înglîzkî û kurdkî (kurmancî û zazakî) biyo. Kirdkîya kitabî hetê Roşan Lezgînî ra amade bîya. Seke texmîn beno, waranê îlmî yê sey psîko-sosyalî û terapîyê hunerî yê trawmatîkan de şixulnayişê kirdkî zaf zehmet o. Eno het ra, yanî bi eno qayde ceribnayişê ziwanî averşîyayişê kirdkî de zaf muhîm o. Seke yeno zaneyene DÎSA hetanî nika 10 kitabî neşr kerdî. AMED /ZAZAKÎ.NET