Hemserekê Tevgerê Cimatê Demokratîkî (TEV-DEM) Xerîb Hiso yo ke derheqê tehdîtanê Erdoganî yê vera Rojawanî de qisey kerd, dîyar kerd ke bi hawayo aşkere dîyar beno ke Erdoganî qerarê şer û qirkerdişî girewto û ê zî do vera înan de xover bidê.
Xerîb Hisoyî ANF ra rojnameger Ersîn Çaksûyî rê qisey kerd û tehdîdanê Tirkîya ser o vindet. Hisoyî tehdîtê Tirkîya sey planê hêrişî yê hemparî yê Tirkîya, Sûrîye, Rûsya û Îranî name kerd û sere de Kurdî û heme şarê herême ra waşt ke wa seba xoverdayîşî bibê yewe.
Hisoyî qiseykerdişê xo de da zanayene ke Erdogan goreyê qanûnanê mîyanneteweyî bi vengdayîşê qirkerdişê sucî keno û wina va: “Çi heyf o ke kes vera nê tewiranê ey de vengê xo nêvejeno. Seba ke înan heta ewro çi kerdo, ci ra hesab nêameyo persayene ewro zî wina hêriş kenê. La ma do vera înan de heta peynî xover bidê. Erdoganî seba şarê Rojawanî qerarê qirkerdişî girewto. Wazenê ke bi hêrişanê Rojawanî krîzanê xo çareser bikerê, la şaşîye kenî. Çimkî çareserîya krîzê înan Tirkîya de ya. Şarê ma vera dagîrkerîye de payan ser o yo. Wa herkes bizano ke ma do xover bidê. Nê hêzê ke seba menfeatê xo nika piştî danê Erdoganî ê do xo mîyan de bikewê têmîyan. No seba rejîmê Sûrîye zî tehluleyêko gird o.”
Wa nê tehlukeyê girdî vindarnî
Hemserekê TEV-DEMî Xerîb Hisoyî veng da Kurdan û vist vîrî ke Erdogan wazeno ke kura de beno wa bibo heme Kurdan çin bikero, coka vera naye de Kurdî zî kura de benê wa bibê ganî vera tehdît û hêrişanê hukmatê Erdoganî de xover bidê û vengê xo berz bikerê. Hisoyî veng da Neteweyê Yewbîyayeyî, Yewîya Ewropa, Yewîya Ereban ke wa nê tehlukeyê girdî vîndarnî û va ‘ganî hînî faşîzmê Erdoganî bêro vindarnayene’.
SERÊKANÎYÊ