Bi no sîstem do hînî otobûsê taybet û yê şaredarî de tena kart bêro xebitnayîş.
Serekîya Dayîreyê Resayîşî ya Şaredarîya Bajarê Girdî ya Amedî sîstemê Dîyarkart de vîyarena sîstemêko newe. Nika otobusan de tena terîfeyo tem, tafîfeyin, qartê astengdar û kesê ke emrê înan 65 ra cor o Diyarkart xebitnenê. La nika ra tepîya do hem otobusanê şaredarî hem zî otobusanê taybetan de tena qart bêro xebitnayîş. Bi no qayde demê bi destan peredayîş qedîyeno. Hemwelatî ke Dîyarkartê înan çin zî o eşkenê qarto ke tena 2 rey vîyareno mîyanê otobuse ra bierînê û bixebitnê.
Bi nê caardişî hûmara kiosklakê bitiknayîşî yê ke mîyanê bajarî de yê zî yena zêdekerdiş. Hemwelatî ke semedê weniştişê otobuse bê kart 1,5 quruş dêne bi sîstemo newe 1,25 quruş danê. No caardiş do 1 Çeleyê 2017î de dest pêbikero.
Xebata daşinasnayîşê kampanya
Serekê Dayîreyê Resayîşî Yilmaz Abîşî derheqê caardişê neweyî de zanayîş da û wina va “Ma caardişê Dîyarkartî de vîyarenê sîstemêko newe. Hînî demê bi destan peredayîş qedîyeno. Ma hînî qert nêdanê şoforan zî. 1ê Çele ra dima hemwelatîyê ke qertê înan çin o nêeşkenê wenişê otobusan. Bi qerto terîfeyîn 1,25 quruş pere amêne dayîş. Wexto ke qert çin bi 1,50 quruş amêne dayîş. Semedo ke wa şarê ma qert bixebitno ma vîyarenê sîstemo newe. Semedê daşinasnayîşê sîstemê neweyî hetanî çend rojî do xeylê bîllboardanê bajarî û otobusan de afîşî bêrê aliqnayîş. Semedo ke wa hemwelatîyê ke qertê înan çin o mexdur mebê zî qerto ke tena 2 rey derbaz beno yeno rotiş.”
Caardiş 1 çele de dest pêkeno
Abîşî îzah kerd ke semedo ke wa hemwelatî zehmetî nêancê mîyanê bajarî de do cayê pirrkerişê qertan bêrê zêde kerdiş û wina va “Ma hûmara cayanê pirrkerdişê qertan zêde kenê. Heto bîn ra hemwelatî eşkenê telefonanê xo ser o zî cayanê pirrkerdişê qertan bimusê hem zî bi telefonan eşkenê qertê xo debikerê. Hînî otobusan de qertê qredî zî derbaz beno. Hem welatî do bieşkê qertê xo yê qredî sey Dîyarkar bixebitnê. Ma nika binawanîya nê sîstemî awan kenê. No caardiş do 1 Çeleyê 2017î des dest pêbikero.
Otobusê taybetî zî mîyan de yê
Abîşî îzah kerd ke, wexto ke şoforî raywanan ra pere gênê o wext zaf qezayê trafîkî bênê û wina va “Bisîstemo newe hûmara qezayanê trafîkî zî kêmî bena. Mabênê şofêr û raywanan de têkilî kêmî bena. No caardiş semedê otobusanê taybetan zî derbaz beno. Ganî hemwelatîyê astengdar û kesê ke emrê înan 65 ra pîl o zî qertê xo newe ra vejê.
AMED