Weşanxaneyê Roşna ra diyna kitabî şî metbea. Bi no hawa emser benê 9 kitabê kirmanckî ke hetê Weşanxaneyê Roşna ra yenî çap kerdene. Goreyê malumato ke keyepelê www.zazaki.net de ameyo dayene; kitabo verîn, bi nameyê ‘Dara Hênî’ yê Hatîp Erdogmuşî yo.
Keyepel de bi no qeyde ca dîyayo muhtewaya nê kitabî: “Muhtewaya nê kitabî wina ya: badê vateyê verînî, derheqê xisûsîyetê sanikan de malumat yeno dayiş. Dima derheqê Dara Hênî de malumatê tarîxî diyenê û demografîya mintîqeyî diyena şinasnayiş ke çend eşîrê ma eno mintîqe de estê û kamcîn dewan de ciwîyenê. Badê enê zî, ena rey nameyê mehlayan, nehîyayan, dewan û mezrayanê Dara Hênî bi rêzkerdişê alfabetîk hem bi tirkî hem bi kirdkî yenê dayiş. Enê malumatê bingeyîn ê, zafê xebatan rê êdî çimeyê sereke yê. Nînan ra pey, ena rey sanik û meselayê ke bi fekê Dara Hênî, hîna zaf zî bi fekê dewa Çimeyê Hênî qeyd biyê estê. Tewr peynî de zî tayê vateyê verînanê ma estê. Xisûsîyeto tewr muhîm yê enê kitabî eno yo, reya verîn a ke bi fekê mintîqeyê Dara Hênî yew kitab wina bi serûber kirdkî de amade beno.”
Reyna goreyê keyepelî kitabê diyin, “Ez Gule ra Hes Kena” yê Roşan Lezgînî yo û bin o qeyde qala nê kitabî ameyo kerdene: “Kitab de 32 hîkayeyî estê. Eno kitab reya verîne 2007 de Îstanbul de Weşanxaneyê Vateyî ra vejîyabi. La seba ke tayê hîkayeyê enê kitabî sey pêardişê (kurgu; fiction) neweyî bîyenanê raştkînan û tayê zî bingeyê folklorî ser o awan bibî, coka hîkayeyê kitabî sey ‘Hîkayeyî û meselayî’ pênase bibî. Labelê eno tarîf yan zî namekerdiş seba hîkayeyanê enê kitabî neheqîyêk bî. Çimkî bi eno hawa pêardişê hîkayeyanê modernan yew terzo edebî yo. Bi çapê diyin ena neheqîya ke bi enê kitabî bibî zî telafî bîye.”
AMED