Kurdistanî ra pîya, coşê Newroz welatanê Awrûpa û pêrokîn dinya de vila beno. Welatanê Ewrûpa de çalakîye bimbarekînê Newroz 18ê Adare de destpa kenê.
Newroza emserr do vera polîtîkayanê înkar û asîmîlasyonî açarîyo hemleya ’Nê’. Xêlê welatanê zey Almanya, Fransa, Îngilîstan, Îtalya, Swîsre, Japonya, Kanada de, des hezarî dê bîrê pêhet û bimbarekînî dê açarîyê Platformê ‘Nê’.
‘Newroz redkerdîşê asîmîlasyonî yo’
Hemserokê Kongreyê Civaka Demokratîke yê Kurdistanijanê Ewrûpa (KCDK-E) Yuksel Koç’î vist vîrî ke Newroz nameyê zabîyayîş û xoverdayîşî yo û veng da şarî ke meydananê Newroz açarnê cayê serewedaritişan. Koçî vist vîrî ke Newrozê emserr dê açarîye platformê vatişê ‘Nê’, vêşîkerdîşê ‘Nê’yan û va, ‘Newroz redkerdîşê asîmîlasyono ke kolonyalîstî ferzê Kurdan kenê yo. Redkerdîşê qetlîam û îxanetî yo. Ganî ma dîktatorîya yew merdimî rê vajê ‘Nê’.
Seba binvistişê faşîzmî firsetêk o
Hemserokê NAV-DEM’î Bahaddîn Dogan’î zî ard ziwan ke iyê dê Newroza emserrî de “Kolonyalîzm, qirkerdiş, dîktatorî û faşîzmî rê vajê ‘Nê’. Dogan’î ard ziwan ke seba binvistişê faşîzmê AKP-MHP Newroz firsetêk o û va, ‘Tewrê ‘Nê’ do bibo têkoşîne demokrasî. Bahaddîn Dogan’î aşkere kerd ke ganî slogana ‘Ocalan’î rê serbestî, Kurdistan’î rê Statu’ bi vengekê berz bîro qîrkerdîş û veng da Kurdistanijan û dostanê ci ke tewrê bimbarekînan bibê.
Welatanê Ewrûpa ra pîya, Japonya, Kanada û Awûstralya de bimbarekînî dê 18ê aşme de destpa bikerê û pêrokîn aşma Adare de dê dewam bikerê. Herzewbîn şanê 20ê Adare de pêrokîn cayan de rayşîyayîşê bi meşaleyî dê virazîye, bi reng û cilanê neteweyî meydanê bimbarekînan dê açarîye cayanê xoverdayîşî.
‘Wext o wext o’
Federasyonê Elewiyan ê Demokratîk yê Ewrûpa (FEDA) zî bi îzahatekê nuşteyî Roşanê Newroz yê şaranê Mezopotamya û Anatolîya selamî kerd û vengê tewrbîyayîşî da. FEDA vist vîrî ke no wesar êşkeno bibo wesarê serbestî û demokrasîya şaran û va, ‘Wext o wexto ke vera zilmê zaliman de ma cayê xo mîyanê govenda xoverdayîşî de bigîrê. FEDA veng da herkesî ke 18ê Adare de tewrê Newroza ke sûka Almanya Frankfûrt de virazîyena bibê.
NAVENDÊ XEBERAN