Kombîyayîşê Astana ke seba çareserîya krîzê Sûrîye 23ê çileyî de bi rayberîya Rûsya, Îran û Tirkîya de amebî viraştiş, netîceyo ke hetê nê dewletan ra ame waştiş, nêame girewtiş. Yeno vatiş ke ‘yê muhîm pêvînayîşê Cenevre yî, Astana ra çîyêk nêvejîyeno’. Babete ser o Unîversîteyê Kadîr Hasî de Pisporê Têkilîyê Mîyanneteweyî Solî Ozelî qisey kerd.
Ozelî qiseykerdişê xo de va ‘Eke merdim hetê Amerîka ra mesele ra biewnîyo, o wext vîneno ke operasyonê Reqqa beno muhîm’ û wina domna: “Kurdê ke bi astengkerdişê Tirkîya beşdarê pêvînayîşan nêameyî kerdiş, nika operasyonê Reqqa ver rewşa înan bena krîtîk.”
Beno ke Reqqa bibedilna
Ozelî dewamê qiseykerdişê xo de va ‘Tirkîya sere ra nata îtîrazê beşdarbîyayîşê PYDyî kena’ û qiseykerdişê xo rê wina dewam kerd: “Qaso ke ma vînenî, ti kes seba ke kurdî beşdar bibî, zorî nêdanî. Tirkîya heta nika waştişê xo bi her kesî da qebulkerdiş, la nika îxtîmal esto ke Reqqa na rewşe bibedilna. Çimkî Amerîka operasyonê Reqqa de YPG û PYD ra bawer kena.”
Esad nînan reyde pê nêkeno
Ozelî qiseykerdişê xo de qala Astana kerd û wina va: “Metnê pêkerdişî esto, labelê heme muxalîfî îmze nêkerdî. Nêyî vanî ma seba ke adirbest îlan bikero, pêşnîyaz berdo Esad rê. Labelê ez bawer nêkena ke Esad waştişê înan qebul bikero. Her kes Rûsya ra vano, ti eşkena hal bikera, labelê ma do bivînî. Heto bin ra çareserkerdişê krîzî de rolê Cenevre zî esto. Ewja de Amerîka zî do bibo. Vatişê Amerîka muhîm o û do o wext dîyar bibo.”
DÎHABER / ENQERA