Tevgerê Cinîyanê Kurdan ê Ewropa (TJK-E) seba çalakîyanê deqeyêkê hurmetramotişî û çalakîyanê 3ê Tebaxe yê serrgêra Qirkerdişê Şengalî veng da. Bi nê amacî plansazîyêka çalakîyan ameye amadekerdene.
TJK-E eşkerayîyêka nuştekîye weşanaye û eşkerayî de vato ‘DAÎŞo ke hêzo tewr barbar ê serdestîya camêrdî yo, 3ê Tebaxa 2014 de Şengal de hêrişê cinî, doman û cimatê Êzidîyan kerd ke ristimê cimatê komunalî yê Kurdîstan û Rojhelatê Mîyanênî yo’.
Eşkerayîye de ameyo vatene ke bi fermanî yo ke bi destê DAÎŞî cimatê Êzidîyan ser o ame bicaardene bi hezaran merdimî ameyî qetilkerdene û eşkerayî wina dewam kerda: “Bi hezaran cinî û domanî ameyî remnayene û sey kole ameyî rotene. Cimato Êzidî erdê xo ra ame dûrfînayene û merdimîye bîye şahidê qirkerdişê tewr barbarî yê seserra 21. Eşkerayîye de veng ame dayene ke çarçewaya vengdayîşê Federasyonê Cinîyanê Êzidîyan de wa her kes 3ê Tebaxe de tewrê çalakîyan bibo. Ma veng danê cinîyanê ma heminan ke wa 3ê Tebaxe Saete 11.00 de seba cinîyanê ma yê ke ameyê remnayene û qetilkerdene, deqeyêk hurmetramotiş bêro kerdene, her kes cilanê sipîyan bido xo ra û bi xurtî tewrê çalakîyan bibo.”
Goreyê eşkerayîye plansazîyêka hîra ya çalakîyanê 3ê Tebaxe ameyo dîyarkerdene. Na çarçewa de Almanya ra heta Fransa, Avûstûrya, Belçîka, Danîmarka, Îngilistan, Swîsre, Norveç, Fînlandîya, Avûstralya, Kanada û sewbîna xeylê cayan de çalakîyî ameyî hedefkerdene.
ANF / BRUKSEL