10ê teşrîna verêne ya 2015 de Anqara de hetê çeteyanê DAIŞî ra hêrîşêko bombeyîn amebî viraştiş û netîceyê hêrişî de 101 kesî merdbî. Roniştişo dîyin yê doza Anqara do ewro Mehkemeya Cezaya Girane ya 4. de bêro dîyayîş. Babete ser o avûkat Îlke Işike qisey kerde.
Işike qiseykerdişê xo de dîyar kerde ke doze ver 36 DAIŞî yenî mehkemekerdiş, labelê nînan ra tena 15 kesî tewqîfkerde yî û roniştişê verêne de 2 kesê bînî zî ameyî tewqîfkerdiş.
Çîyêk nêameyo kerdiş
Işike dewamê qiseykerdişê xo de va kesê bi nameyê Halîl Îbrahîm Durgun, Yunus Durmaz û Mehmet Kadîr Cebaelî ke sey kerdoxê hedîseyî yenî zanayîş, heta nika derheqê mergê înan de çîyêk nêameyo kerdiş û wina va: “Ma nêzanî ke nêyî senî kişîyayî. Ma waştbî ke materyalê dîjîtalî wa bierşawyî heyetê pisporan rê. Nînan ra tayê ameyî, tayê zî nêameyî.”
ŞÛJIN/ENQERA