Newroze bi serrana ke akewtene wisarî silomnena la belê di Kurdistanî de verba dewleta tirk nameyê têkoşînê bî Newroz û no ser zî dewleta tirk her tim waşt Newroze qedexe bikero.
La qet kurdan destûr nêdayî ke roşanê înan bêro qedexekerdiş. Di serra 2000’an de dewleta tirk Newroza Amede ra hêriş kerdbî û peynî hêrişê dewleta tirk bi hezaran kesî birîndar bîyê, bi hezaran amey girewtiş û zaf kesî zî cuyayişê xo day.
Dîroka kurdan de Newroz tena nameyê têkoşîn nê, nameyê destpêka ravêreyeya aştî zî bî. Di serra 2013 Newroza Amede de Rayverê Şarê Kurd Abdullah Ocalan destpê ravêreyeya çareserî kerd û na roje ra nika Tirkîyaye de vengê çekan vindert. Peynîya aşkerayê 10 maddeyî Newroza 2015 hîna bi qiymet bî, çimkî êdî şarê kurd di Newroze de wazenî Rayverî xo bivinî. Newroza Amed a 2015 ser endamê Komîteya Tertîp a Newroza Amede Edîp Berk agahî da.
Gamê şenber lazim î
Berk aşkera kerd ke taybetîya na Newroze zaf a, çimkî seba na Newroze gamê muhîm amey eştiş, emserre ê bawerî ke do Newroza Amede ra 3 mîlyon kesî beşdar bibî û di 120 navendî de Newroze bêro firazkerdiş û wina vat: “Dirûşmeyê Newroze êdî bes o, Rayverî ma do azad bibo û mîyanê ma de bibo yo. Şarê kurd wazeno êdî Rayverî xo bivîno, birêz Abdullah Ocalan di dinyaye de tewr gird Rayver yeno hesibnayiş. Hewna birêz Ocalan seba cuyayişê ra viyartişê demokrasîye gamê şenber erzeno û no ser zî heme dorûverê demokratî Ocalanî şopnenî. Ma êdî wazenî Rayverê ma bêro mîyanê ma û 3 mîlyon kesî do Newroza Amede de azadîya Rayverî xo biqîrê.”
Berk destnîşan kerd ke ê wazenî Rayverê Şarê Kurd Abdullah Ocalan beşdarê Newroza Amede bibo la eke Ocalan nêbo se zî dîmen û bi vengê Rayverê Şarê Kurd Abdullah Ocalan do Newroza Amede ra beşdar bibo û bi vengê beşdarwanê Newroze ra xîtap bikero, çimkî vatiş û peyamê Ocalanî seba rojdemê dinyaye zaf bi muhîm o û wina domna: “Êdî her kes zaneno meseleyê kurd zey verên yew mesele nîyo û no ser zî êdî dewleta tirk zî fam kerd ke nêeşkeno bi polîtîkayê xo lêminî no meseleye çareser bikero û no ser zî dewleta tirk nêçare destpê eştişê gamê şenber kerd.”
Têkoşîn domyeno
Berk vat ke tesbîtê û çareserîya na meseleye ser birêz Ocalan 10 madde vernîyaz kerd û dema aşkerakerdişê nê 10 maddeyî dewleta tirk aşkera kerd ke do gamê şenber bierzo, emserre Newroze Amede xoverodayişê Şengal û Kobanê ra xela ame kerdiş, çimkî di noca de verba dijmînê merdimatîyê û Dehaqê ewroyî çeteyê DAIŞî têkoşînake dîrok ame dayiş û na têkoşîn zî bi can û gonî ame dayiş û têkoşîn hema zî domyeno.
Berk dîyar kerd ke êdî heme şarê dinya zanenî ke çew nêeşkeno kurdan ra zilm bikero, na rewşe zî tewr weş têkoşîna Kobanê û Şengale qanit kerd. Berk vat ke na Newroze têkoşîna Kobanê û Şengale ra xela ya.