Pêşnîyazê bedilnayîşê qanûno bingeyî bi reyanê AKP û MHPyî meclîs ra derbaz bî û erşawîya Serekkomarî ver. Eke Serekkomar Erdogan tesdîq bikero, o wext do prosesê referandûmî dest pêbikero.

Sereka Pêroyî ya Partîya Kede (EMEP) Selma Gurkane babete ser o qisey kerde.Gurkane va ‘weçînayîşê 7ê Hezîrane ra dima AKP seba ke îqtîrê xo bipawo, îradeya şarî nêşinasna û îxtîmal esto ke prosesê referandûmî de zî wina bibo’ û wina domnaye: “Hukmat kaos, şîddet û şerî ser ro sîyaset dano meşnayîş, lejo ke wextê pêvînayîşê bedilnayîşê qanûno bingeyî de vejîya zî do prosesê referandûmî de raybazêko senî bêro xebetnayîş, bi hawayo zelal nîşanê ma bido.”

Muxalîfî tepişîyenî

Gurkane dewamê qiseykerdişê xo de va ‘seba xebatê AKP û MHPyî heme îmkanê dewlete yenî seferberkerdiş, la seba muxalîfan destûr daxî nêdîyeno’ û wina dewam kerde: “Yê ke taxan de kampanyaya ‘nê’ danî meşnayîş, yenî tepiştiş û raştê şîddetî yenî. Çalakî û aktîvîteyî hetê walî û qeymeqaman ra yenî qedexekerdiş. O wext ma do senî şêrî şarî ra vajî? Nika Hemserekê HDPyî zî tede xeylê parlamenter û bi hezaran kesî tewqîfkerde yî. Ma na rewşe qebul nêkenî.”

Ma dest bi xebatî kerdo

Gurkane dîyar kerde ke ‘ma bi mektuba vengdayîşî ke seba karkeran nuştbî, dest bi xebatî kerdo’ û wina va: “Wezîfeyê ma no yo ke no bedilnayîşê qanûno bingeyî yeno çi mana, ma bi şar bidî famkerdiş û şarî reyde bi xebatanê ortax bikerî û hêzêko gird vejî orte. Eke rewşêka provakatîfe nêvejîyo orte, do netîce de ‘nê’ qezenc bikero. Xora eke ‘nê’ qezenc bikero, meseleyo esasî do o wext dest pêbikero. Çimkî o wext persê ‘ma wazenî Tirkîyayêka senîn de bicuyî?’ vejîyeno orte. Yanî o wext wezîfeyê ma newe dest pêkeno.”

Lazimîya azadî û demokrasî esta

Gurkane peynîya qiseykerdişê xo de va ‘hukmatê AKPyî hêrişê muxalîfan keno û HDPyî zî bi rêxistinanê terorî reyde şinase keno’ û qiseykerdişê xo wina qedênaye: “Ganî vera nê nizdîybîyayîşê hukmatî de CHP û HDP bêrî têhet û pîya hereket bikerî. Ganî CHP no het de nêvajo, ‘AKP do se bikero û derheqê mi de çi vajo’ ganî seba aştî û demokratîkbîyayîşê nê welatî rayîrê pîya têgêrayîşan bigêro. Çimkî lazimîya welatî seba azadî û demokrasî esta û no het de berpirsîyarîya ke kewena milê ma yê hemînan esta. Eke netîce de ‘nê’ qezenc bikero, do vernîya Tirkîya biabo. Seba averşîyayîşê têkoşînê demokratîke ganî hêzê demokratîke pîya hereket bikerî. Çimkî pîya hereket kerdiş, seba ma hemînan do hîna zaf xêrin bibo.” 


SEDA TAŞKIN / DÎHABER / ENQERA