Xelîlî va ‘hedîseyê tewr polîtîk yê serra 2016 awankerdişê Meclîsê Sûrîyeya Demokratîke (MSD) bî. Raştîya xo de no seba serra 2017 zî derbazdar o. Çend sebebê ci estî û nînan ra ya yewine, seba ke Sûrîye de krîz domîyayêne, hetê rêxistine û sîyasî de govdeyêk çinêbî. Reyna vurîyayîşêko polîtîk çinêbî, eke nêyî bibîyêne bedilîyayîşêko demokratîk zî bîyêne. No meclîs do bibo dendika komelê Sûrîye. Îdareyê Xoserîya Demokratîke kewt serra xo ya 4. û seba çareserîyêka demokratîke bî finak. Nê îdareyî prosesêko winasî de seba çareserîye gam eşt.”
Gamêka gird bî
Xelîlî dewamê qiseykerdişê xo de va ‘5 welatanê Ewropa de abîyayîşê Temsîlkarîya Îdareyê Xoserîya Demokratîke hetê dîplomatîk de gamêka gird bî’ û wina dewam kerd: “Abîyayîşê dîplomasîya Îdareyê Xoserî gamêka tarîxî bî. Seba pêresayîş û xo temsîlkerdişê şar û bawerîyanê kurd, elewî, êzidî û sewbîna firsendêko tarîxî bî. Sîyasetmedar, roşnvîr, alimê dînî û komelê ke bi desan serran yewbînan ra cîya ciwîyayî, ameyî têhet. Çimkî nêyî heme wextê rejîmî de her çiqas ke eynî welatî de ciwîyayênê zî nêameyênê hetê yewbînan. Peymanê muhîmî virazîyayî û nînan ra yewe zî Peymanê Teyyar Elgatî bî. Bi rayberîya Komara Ereban ya Misirî aver şîye.”
Ewleyî û îstîkrar
Xelîlî dîyar kerde ke çareserîya krîzê Sûrîye, girêdayeyê 2 esasan o û va: “Nînan ra yewe qedênayîşê terorî yo, ya dîyine zî bedilîyayîşê demokratîke yo. Hêzê ke nêyî pê bîyarî YPG, YPJ û HSD yî. Serra 2016 de Şedad, Minbic, Şêx Meqsûd û Efrîn raştîya xoverdayîşê şarî nîşanê ma da. Reyna merhaleyo dîyine yê Xezebê Firatî dest pêkerd. Na hemle ra dima şarê Reqa ra 1500 kes beşdar bîyî. Ame îspatkerdiş ke serra 2016 serra pawitişê heme şaranê Sûrîyeya Vakurî yo.
Koçêko gird beno
Xelîlî bale ant ewleyîya Rojawanî ser û wina qedêna: “Seba ke Rojawan de warêko ewleyî virazîyayo, xeylê waranê bînan ra koçêko gird bî. Serra 2016 de bi xeta 3. hetê komelkî, sîyasî, demokratîk, dîplomatîk û ekonomî de gamê muhîmî erzîyayî. Qezencê 2016î do seba 2017 de biagêro xeta neteweyî. Çîyo ke ewro yeno ciwîyayîş no yo; ma Sûrîye de bedilîyayîşêko gird aver berd. Her çiqas ke tayê waştî ke xeta ma sîya bikerî. Nêyî hetê mîyaneteweyî de xeylê piştî zî girewtî, labelê ma dî ke nêeşkenî xeta ma biviyarnî. Sûrîye de bê ma çareserîyêk nêbeno û ma seba her kesê ke wazenî bi demokratîkbîyayîş çareser bibo rê akerde yî. Ma Rojawan de xeylê bedelê girdî dayî û bi no hawa komelbîyayîşêk awan kerd. Ma hêvî kenî ke no komelbîyayîş do şer û zordarîye bido vindarnayîş. Ma wazenî Sûrîyeyêka demokratîk de biciwî û no zî ancax bi Komara Sûrîyeya Federale ya Demokratîke mumkin o.”
QAMiŞLO