Çalakîya grevê vêşanî ya Nurîye Gulmene û Semîh Ozakçayî ke seba tepîya agêrayîşê karê xo daybî destpêkerdiş, roja 167. de dewam kena. Çalakgerî Nêweşxaneyê Zîndanê Sîncanî de manenî û rewşa înan her ke şona xirabêr bena.
Çalakîya ke seba piştîdayîşê Gulmene û Ozakçayî Caddeyê Yukselî de yena kerdiş zî roja 287. de dewam kena. Sey her roje çalakgeran waştî ke Caddeyê Yukselî de vernîya Abîdeya Heqê Merdiman de îzehet bidîy çapemenîye. Seba ci çalakgerî Ziqaqê Konurî de ameyî têhet û labelê polîsan destûr nêdayî ke bimeşyî û vernîya înan de qalxanan reyde barîkat ronayî.
Çalakgeran waşt vernîya qalxananê polîsan de îzehet bidîy çapemenîye. Çalakgeran pankartanê ‘Wa Nazîfe Onaye serbest bêro veradayîş’, ‘Çalakîya Nurîye û Semîhî roja 167. de ya, wa Nurîye û Semîh serbest bêrî veradayîş’ akerdî û slogananê ‘Nurîye û Semîh rûmetê ma yî’ û ‘Ma kedkar î, heqdar î û ma do qezenç bikerî’ eştî.
Şima heme dizd î
Polîsan mudaxaleyê çalakgeran kerd û pankartanê çalakgeran dirnayî. Welatîyê dormeyî zî bi çepikan destek dayî çalakgeran. Polîsan kesê ke piştî dayêne çalakgeran bi kamera antênê.
Çalakgeran vera polîsê ke înan heta Caddeyê Meşrûtîyetî dehf dayî rê wina vatî: “Embazê ma ameyî îxraçkerdiş û ma pey înan de yî. Labelê embazê şima ameyî îxraçkerdiş, rojêk do şima zî bêrî îxraçkerdiş, labelê do kes pey şima de nêvindero. Şima heme dizd î. Çalakî bi çepikan qedîyaye.
DÎHABER/ANQARA