Hidir Demîr o ke Qetlîyamê Anqara ra bi hawayo birîndar xelisîyabî û dima ra bi Qerarnameyê Hukmê Qanûnî (KHK) karê xo ra ame îxraçkerdiş, derheqê referandûmî de qisey kerd û fikrê xo aşkere kerd. Demîrî va ‘ganî merdim verê cû biewnîyo ka referandûm seba lazimîya karker û kedkaran yeno viraştiş, yan zî seba kes, partî û sewbîna yeno viraştiş?’ û qiseykerdişê xo wina domna: “Referandûm seba ke çimeyê heme welatî bidîyo kesêk yeno viraştiş. Ez bi xo weçînayîşê referandûmî bi hawayo antîdemokratîk vînena.”
Sey bomba tesîrin î
Demîrî qiseykerdişê xo de bale ant Qetlîyamo ke 10ê Teşrîna verêne de Anqara de virazîya ser û wina va: “Hedefê ê kesê ke Anqara de kom bîbî, o bî ke welat de aştî hakim bikerî û seba têkoşînê aştîye ewja de bîy. Çîyê ke ewro yenî kerdiş, qasê bombayê ke 10ê teşrîna verêne de teqayî tesîrin î û benî sebeb ke şar ca û warê xo ra dûrî bibo. 10ê teşrîna verêne ra dima bajarî merdimî zî tede ameyî rijnayîş. 10ê teşrîna verêne ra ver zî merdimî ameyênê qetilkerdiş. Serranê 90î de 17 hezar merdimî ameyî kiştiş. Xora ewro Dayîkê Şeme no het de çalakîyan virazenî. Her çiqas ke derheqê teqayîşê 10ê teşrîna verêne de hende çîyî ameyî tespîtkerdiş, labelê heta nika tena kesêk daxî nêameyo cezakerdiş.”
Seba ke zêde nêbî nê
Demîrî dewamê qiseykerdişê xo de va ‘eke ya bivejîyo, o wext do hesabê Qetlîyamê Anqara nêro perskerdiş’ û wina qedêna: “Eke wina bibo îxtîmal esto ke bi KHK û Varlik Fonu heme çimeyanê nê welatî bikerî bin xizmetê kesêk.Cok ra ma veng danî heme kedkar, bindest û pêroyî şarê xo, seba welatêko ortax û şert û mercê seyyewbînan wa vajî nê. Wa nê xêrin bo.”
DERSIM