FÎLÎZ ZEYREK / EDENE - ŞÛJIN
Keso bi nameyê Bedrettîn K. û 4 kesê bînî qezaya Seyhanî ya Edene de domanêka 13 serreyî remnayî. 5 kesan tecawizê domana 13 serreyî kerdî û waştî ke aye qetil bikerî. Hedîse hetê bekçîyo kehen yê fabrîka ra ame ferqkerdiş û hêrişkarî cayê hedîse ra remayî.
Domana şenike nêweşxane de îfade da polîsan û îfadeyê aye ra dima Bedrettîn K. ame tepiştiş. Tedawî ra dima domane yurd de ameye bicakerdiş û derheqê hedîseyî de doze abîye. Domnayîşê doze de qerarê nimiteyî dîya û Raporê Tibo Edlî do nê rojan de aşkere bibo. Ame zanayîş ke keyeyê domana şenike seba pereyî keyeyê tecawizkar Bedrettîn K.yî reyde pê kerdo û qerar dayî ke yewbînan reyde bidî zewijnayîş.
Babete ser o Avûkat Sevîl Araciye qisey kerde.
Araciye qiseykerdişê xo de wina va: “Her çiqas ke qanûnê tecawizî meclîs ra tepîya bêro antiş zî bi hawayo fîîlî yeno domnayîş. Beno ke mexdurîyetî hîna zaf bibîy. Çimkî hêrişkarî yenê pawitiş. Eke reaksîyonanê cinîyan ra nêbîyênê do qanûnê tecawizî tepîya nêameyêne antiş. Qanûnê tecawizî bi destê keye û dewlete yeno meşnayîş. Hedîseyê tecawizî yenê meşrûkerdiş. Ganî hêrişkarî bi cezayê giranan bêrî cezakerdiş. Na rewşe de bar kewena milê rêxistinanê cinîyan ser. Heme dozan de kesê ke mexdur benê cinî yî. Kesê ke raştê tecawizî yenê domanê feqîran î. Keyeyê feqîrî benê hedefê tecawizkaran.”