3’ê Tebax 2014’î zey rojê da gonîn û reş kewt dîroka Kurdistan. No dem de ver çimandê pêrokîn dinya de jû trajediyê da tewr gird qewimî. Çeteyê ke kincê ci û zerriya ci reş hêrişê hardê qedîm yê Êzidiyan Şengal kerd û qetlîamê da gonîn viraştî. Êzidiyê ke dîrok de 73 reynî-finî raştê fermanan ameybî, fina bi jû qetlîamê da bîn ra rî bi rî mendî. Koyê Şengal ra qîrayiş û hewara bi jan berz bî û pêrokîn sînoran ravêrna, resya heta asmenan. Bi hezaran Êzidî amey qetilkerdin, xeylê kes rîwalê veyşanî û teyşanî koyê Şengal de weşiya xo kerdî vinî. Bi hezarî ceniyê Êzidî zey kole hetê çeteyan amey remnayen. Des hezarî Êzidî zî kewtî rayanê goçberî. Yê ke peynî de mendî zî bi zorvajî û zehmetiyê girdî xo resnay corê koyê Şengal û xo xelesnay.

O wext tenya gerîlayê YJA-Star, HPG, YPG-J resyay hewara Şengal û pawitena şarî girotî. Badê tertele, Şengal de her çî vurniya. Ronişteyê Şengal tifing girotî destê xo û destpa pawitena cewherî kerdî. Quwetê xo-pawiten yê Şengal ronay. Roja qetlîam ra na het, Şengal de mavêna quwetanê Kurd û çeteyan de pirodayişan dewam kerd.

Şengal gam bi gam xelesyena. 12’ê Mijdar’î de operasyonê wertex yê quwetanê Şengal destpa kerd. Operasyon de kişta rojawa de quwetanê HPŞ, YBŞ, HPG, YJA-Star, YPG mewzî girot. Wezîfeyê kişta rojhelat zî peşmergeyan girot. Quwetanê koalîsyonê mavênnetewî zî asmen ra destek danê operasyon. Çarçoveyê na hemle de xeylê dewan ra piya zerreyê sûk çeteyan ra ame xelesnayen. 

Bi na hemle ra piya raya xeta Şengal-Rojawa kewt bin qontrolê quwetanê Êzidîxan. Endî raya Reqa û yê Musil zî pê ra birniya. Na zî serva DAİŞ yena maneya derbeyê da giran. Xeber a bîn a mihîm zî na ya ke, operasyonî de pêrokîn quwetê lejkerî yê Kurd piya ca gênê. Na zî serva dewleta tirk jû derbeyê da gird a. Çi ke dewleta tirk pêrokîn leteyan de verra Kurdan herb îlan kerd. Wezîrê karê teber yê tirkiye Ferîdun Sinirlioğlu 3-4’ê na aşmî de şi ziyaretê herêma Başûr. Sinirlioğlu no ziyaretî de sermiyananê Başûr ra waşt ke verra hereketa serbestiya Kurd herb bikerê. Rîwalê hemkariya bi dewleta tirk îdareyê herema başûr nêwaşt ke quwetê gerîlayan operasyonê xelesnayişê Şengal de bimanê. Bi hemleya peynî yê Şengal ra piya planê dewleta tirk puç vejyay. Bi vinîkerdişê DAİŞ ra piya dewleta tirk zî gonî kena vinî. 

La piyakariya îdareyê herema başûr bi AKP ramena. Çapemeniya PDK operasyon de ca girotişê quwetanê Kurd niminena. Zey ke ‘tenya peymerge operasyon ramenê’ damisnena. PDK nêwazena ke AKP biaşnawo ke peşmergeyê ci bi quwetanê piyayî yê Kurd ra piya hereket kenê. La eki PDK no dem de çarçoveyê menfatê netewî hereket bikero do şarê Kurd serkewo. Çi ke siyaseta AKP her ca de teng bena û veng-tol vejyena. Didi serriyo AKP çeteyanê DAİŞ verra Kurdan da lejkerdiş. La endî DAİŞ rê ca beno teng. Tenya DAİŞ rê nê herzewbîn AKP rê zî. Çi ke şarê Kurd her ca de pawitena xo ya cewherî gêno û gam bi gam nezdiyê xoserey beno. Ne DAİŞ, ne AKP ne zî jû quweta bîn nêşena verniya nay de bimano. Mixabin PDK zî heta nika verniya jûbiyena netewî de bî manî. Bi dişmenanê şarê Kurd ra piya îtifaq û piyakarî kerd. Omid kenime ke neyra tepya PDK zî goreyê menfatê Kürdistan hereket bikero. 

Başûrê Kurdistan hetê siyaset nika biyo lete lete. Rîwalê siyasetê şaş, rîwalê meseleyê sîstema pûç, hêrs û nêrazîbiyenê şarî roj bi roj benê vêşî. Bi serrano zey dewleta tirkiye îdareya herema Başûr zî şarî bi polîtîkaya feqîrtî, bê-karî, veyşanî û teyşanî kena mixtacê xo. Petrolê Kurdistan ercanî roşena tirkiye û welatanê bîn. La endî ê rojî ravêrenê. Çi ke çim û mezgê şarî abiyeno. Nayî ra îdareya malbata Berzanî ya do sîstemê da demokratîk rono, ya zî do zey AKP ser şarê xo bibo dîktator û peyniya xo biyaro. 

La serva-qandê nika, çiyo mihîm mijdaniya xelesnayişê Şengal o.