Hêrişê dagîrkerîye ver mexdûrê tewr girdî yê dagîrkerîya Tirkîya doman ê. Domanê ke benê hedefê hêrişan heqanê xo yê bingehînan kenê vîndî. Dewleta Tirkîya ya dagîrkere hêrişan de sîlehê qedexekerdeyî ke yeno texmînkerdene ke fosforo sipî yo xebitnayî.
Zaf domanî bi nê sîlehan bîyî birîndar û bedenê domanan veşa. Domanê Dirbêsîyê hişyarê na hovîtîye yê. Ê her yewî yew vateyê xo esto. Pêro zî mexdûrê dagîrkerîye yê û vera nê dagîrkerîye de bihêrs ê.
Mîrna kênekeka qijkek a. Rîyê xo hîna zî huyeno. Çimê xo yê keskî berîqîyenê. Vana “Ma wazenê ke agêrê dibistana xo.” La ters û qisaweta xo ya hêrişanê Dewleta Tirkî zî nênimnena. Mîrna vana ‘Tirkî kewtê na herême, ma tersenê’ û destnîşan kena ke înan bêrîya cuya xo ya verêne kerda. Mîrna wina vana: “Ma wazenê agêrê dibistana xo, ma wazenê cîranê ma agêrê û sey verê têlewe de bê.” Mîrna domananê Serêkanîyê ke bi sîlehanê qedexekerdeyan ameyê veşnayene zî ana vîrî û persê ‘Gelo zerrîya kesî nêveşena?’ kena.”
Ma domanî to ra nêtersenê
Her çar domanî pîya veng danê û vanê ‘Erdogan domanan mekişe’. Înan ra yew bi engiştanê xo nîşanê serkewtişî keno û huyeno. Pey cû înan ra yew Erdoganî ra vano ‘Serêkanîyêyijan to rê se kerd ke ti domananê înan kişenî?’ Domanî mesajî zî danê û vanê ‘Ma domanê Dirbêsîyê yê, to ra nêtersenê.’ Yew kêneka bîne ya Dirbêsîyê ke nameyê xo Gulî ya, vana ke Serêkanîyê ameya dagîrkerdene û domanî êdî nêeşkenê perwerde bivînê. Kêneke dîyar kena ke a zî nêeşkena şêra dibistane û destnîşan kena “Fosfor eştî Serêkanîyê. Ez hêvî kena ke ma bieşke şorê dibistane û reyna cîrananê xo reyde bê.”
ANF/DIRBÊSÎYÊ