Kurdistan de xêlê domanê ke pîyê xo dima ra amey dinya û mayanê xo kerdî vinî, bê ke înan bisilasnê pîl bîye. Nê cayan re jew zî Cizîra Botan a ke wextê qedexeyê vejyayişê teberî yê 14ê Kanûna 2015î de bi desan welatijan weşîya xo kerdî vinî ya. Xêlê domanî badê pîyê xo yê ke xoverdayişî de ca girotî amey dinya û nameyê înan girotî.
Nê domanan (qeçek) ra jew zî lajê Orhan Tûnç o ke cêrzemînê Cizîr de hetê quwetanê dewlet ame qetilkerdiş, Bêkes o. Wexto ke Bêkes ame dinya pîyê ci cêrzemîn de bi dirbetin. Telefonê malbatê xo kerd û wina va: “Eke ez bîra ez o nameyê lajê xo bida. Eke ez nîra zî wa nameyê ci Bêkes bo.” Bado ke Orhan Tûnç weşîya xo kerd vinî malbat kamîya ci de nameyê Bêkesê werdî kena Orhan, la zerreyê malbatî de bi nameyê Bêkes yeno vengdayiş. Bêkes nika seba malbatê Mehmet û Orhan Tûnçî bîyo zey omideke weşîye. Pêrokîn malbat dej û janê hurdî lajanê xo bi estbîyayişê Bêkesê werdî tayî bo zî teselî kenê.
Malbata Tûnçî de her kes bi Bêkesî ra eleqedar beno. Hesret û janê xo yê lajanê xo bi Bêkesî ravêrnenê. Pîrika Bêkes, Esmer Tûnç aşkere kena ke wexto ke Bêkes resîmê pîyê xo û apê xo vîneno maç keno, rexmo ke hona werdî yo, la vengayîyeke gird zerya xo de ciwîyeno.
Pîyê xo ra dima ame dinya
Cizîra Botan de xêlê istanikî zeypê yê. Wexto ke Sahîb Edîn vera qedexeyê dewlet de xover da nêzana bi ke cinîya ci diganî ya. Roja 79. yê qedexe de Sahîb Edîn weşîya xo kerd vinî û qedexe ra dima cenazeya ci zerreyê jû sindoqî de amê vînayiş.
Sahîb Baranê werdî (qijkek) bado ke pîye ci şehîd kewt 6 aşman ra dima ame dinya û nika 4 aşmî yo. Rexmo ke 3 domanê bîn yê cinîya Sahîb Edîn, Bêrîvan Edîn estê zî, rîwalo ke nameyê merdeyê xo dayo domanê xo, keye de tewr vêşêr zî Sahîb Baran raştê eleqe yeno û yeno heskerdiş.