212 cenazeyê domananê kurdan ê ke şer û pirodayîşan de weşîya xo kerdî vinî, mezelê bêkesan yê Amedî de amey definkerden. 214 cenaze zî morgan de yenê vindernayîş. Rixmo ke malbatî cenazeya domananê xo silasnenê zî, cenaze nêdanê malbatan.Malbatê ke nêşkenê cenazeyê domananê xo bigîrê, aşkere kerdî ke domanê înan bêkes nîye, pey înan de şar esto.
Amed de 2015 de rîwalê pirodayîşan, kiştişî zî bê vêşî. Quwetanê dewlet bi desan kesan qetil kerd. Bi sebebo ke cenazeyê xêlê gencê ke amey kiştiş ameyê parçekerdiş, nînê silasnayen.
15 rojan ra dima yenê definkerdiş
Malbatê ke nêşay cenazeyan teşhîs bikerê, cenazeyê domananê înan mezelê bêkesan de amey defin kerden. Vûrnayîşê zagonanê derheqê Sazîya Tipa Edlî (ATK) ra dima, bê ke paweyê malbatan vinderê, cenaze mezelê bêkesan de amey definkerdiş. Goreyê zagonê newî yê ATK, cenazeyê ke heta 15 rojan nînê teşhîskerdiş mezelê bêkesan de yenê definkerdiş. Rixmo ke tayî cenaze yenê silasnayen zî, bi behaneyê paweyê testê DNA yê, mezelê bêkesan de yenê definkerdiş.Heta nika, rixmo ke malbatan silasnayê zî, 212 cenaze mezelê bêkesan de amey definkerdiş.
‘Cenazeyan nêdanê’
Nê cenazeyan ra yew zî yê endamê HPG Ahmet Dervîş (Harem Kobanê) ke 20'ê Adare de çoltarê Lîcê de weşîya xo kerd vinî ya. Rixmo ke keyeyanê Dervîşî cenazeya lajê xo silasna zî, cenaze nêdanê ci. Keyeyê Dervîş ke Kobanê de ciwîyenê, seba girewtişê cenazeyê lajê xo şî Amed zî, nêşay cenaze bigîrê. PDK destûr nêda ke cenaze kêberê Sêmalka ra û AKP zî destûr nêda sînorê Riha ra cenaze ravêrnîyo Kobanê.
Cenazeyê ke morga nêweşxaneyê Lêkolîn û Perwerde yê Gazi Yaşargilî de yê, rixmo ke malbatan teşhîs kerdî zî mezelê Yenîkoy de, beşê bêkesan de amey defin kerdiş.
214 cenaze morgî de yê
212 cenazeyê domananê kurd mezelê bêkesan de amey definkerdiş. Goreyê zonayîşê malbatan, cenazeyê 212 kesan mezelê bêkesan de ameyê definkerdiş û 214 cenaze zî morgan de yenê vindernayîş.
212 cenazeyan ra, 18ê ci Amed de (2’yê ci yê cinîyan morgî de yê) Mêrdîn de 12 cenaze, Riha de 35 cenaze, Erzirom de 51 cenaze, Meletî de 30 cenaze, Dîlok de 20 cenaze, Şirnex de 2 cenaze, Wan de 7 cenaze û Sîlopya de zî 37 cenaze mezelê bêkesan de amey definkerdiş.
DÎHABER/AMED