ZUHAL ATLAN MA/ŞIRNEX Cinîya bi nameyê Esmer Çikmaza ke destê aye de xirqeyêk û bi vatişê ‘Mi cilanê kênaya xo ra aye şinasna’ yena vîrê ma, hîna tazîyeya kênaya xo nêtepiştbî, na rey lajê aye Vahap Hezex de şehîd keweno. Hîkayeya dayîka Çikmaze zî sey cinîyanê bînanî ya. Serranê 90î de dewa înan ya ke Koyanê Gabarî de ya, yena veşnayene û mecbûr manenî koçê Cizîrî bikerî. Labelê zextî Cizîr de zî pey Çikmaze nêverdanî. Çikmaze dîyar kerde ke hîna qedexeyî dest pênêkerdbî, kênaya aye Yasemîne seba dîyayîşê embazanê xo vejîyaye û wina domnaye: “Êdî mi qet kênaya xo nêdî. Wexê cêrzemînan de her ke ma waşt kêna û embazanê aye cêrzemînan ra bixelisnî, gule nîyayî ma ro. 7ê Sibate de kênaya mi şehîd kewte. Wa Homa heqê ma nê zaliman rê nêverdo. Wexto ke ez şîya cenazeya kênaya xo ser, mi aye nêşinasna. Seke naylon ser laşê aye de helênaybî. Ma cenazeya xo binê sîlehanê luledergan de defin kerd.” Dima ra dayîke xebera mergê lajê xo gêna, labelê polîsî şonî keyeyê dayîke û persê lajê aye kenî. Herçiqas ke dayîke vana ‘şima lajê mi kişt’ zî zextî peynî nêbenî. Herçiqas ke 2 serrî derbaz bîyî zî polîsî hîna zî yenî persê lajê aye kenî. Çikmaze wina va: “Derheqê Vahapî de qerarê gêrayîşî esto û polîsî ameyî pers kerdî. Mi zî va ‘Şima lajê mi kişt, şima mi ra çi wazenî?’ Serranê 90î ra nata ma rojêka başe nêdî. Heta ke kurdî nêbî yewe, nê dejî do dewam bikerî. Domanê ma yê şenikî do nînan xo vîra nêkerî.”