Bira dadgehî hetê nêyî de vatênê ke tay rojan de zî hetê keso wezîfedar de do pîyê xo rey de pêvînayîş bikero. Labelê Ezgî Alan vana ke 24’ê citmenge ra heta nika ya domanê xo nêvînena û wina vat: “Dadgeha ke 2’ê citmenge de ame vînayîş de hakîme bira doman do hetê dayîke de bimano û şemeya 1’in û 3’in de zî do hetê keso wezîfedar de do pîyê xo rey pêvînayîş bikero day. Dadgehî ra dima şemeya ewil çew nêame, labelê 23’ê citmenge de keso ke xo hezey karmendê îcraye da naskerdiş min gêra û min ra vat ke ma domanî do to ra bigîrî. Her çende ke min vat eyro şemeyê 4’in o zî rayna amey û mêrdeyê min zî cêra payîvê înan bî.”
Goreyê serê xo kerdî
Alan dergeyîya qalîkerdişê xo de ciresna ke 2 polîsî û 2 karmendê îcraye û yew zî pedagog amey keyeyê ya û wina domna: “Ma nêzdîyê 2 saetî nîqaş kerd. Ma bi bire bîy ke domanî nêdî înan, labelê êy vatênê ma bi zorî gênî. Karmendî her çend ke hefteya çarin bî zî, aye hefte sey hefteya pancin humaritî. Ez neçar menda ke domanê xo teslîmê înan bikera. Min bi destê xo domanê xo teslîmê pedagogî kerd. Labelê bade ez bi desan rey pedagogî gêraya, la verpersê telefonanê min nêda. 24’ê citmenge ra heta nika ez domanê xo ra ti xeber nêgena. Ez ewil qerekol, polîs, pedagog û hemînan ra dewacî ya. Min domanê xo teslîmê dewlete kerd û înan ra wazena.”