FÎLÎZ ZEYREK/EDENE
Tirkîya de îdareyê fehmî bi hawayo tewr asan rêzefîlman reyde yeno viraştiş. Bi serran o sektorê rêzefîlman xizmetê şero taybetî keno. Newe ra xelqkerdişê rolê cînsîyetê komelkî ra bigîre heta normalîzekerdişê mîlîtarîzm û şîddetî heme bi nê rêzefîlman benî.
Demê peyênan de zaf hûmare de rêzefîlmê ke şîddetî mîyanê xo de hewênenî, yenî weşênayîş û nê rêzefîlmî zî tewr zaf domanan ser de tesîr kenî. Bitaybetî 15ê Temmuze ra dima rêzefîlmê ke yenî weşênayîş û dewlete zî piştî dana nê rêzefîlman, komel mîyan de şîddetî sey kayî nîşan danî û normalîze kenî. Bitaybetî taxê ke feqîrî tede cuyenî, şîddet sey kayî hetê domanan ra yeno kaykerdiş. Sereyê her ziqaqî de domanê ke destê înan de sîlehê zurayênî estî, kayanê şer û mergî kay kenî.
Babete ser o Psîkolog Şîyar Guldîkenî qisey kerd û no het de hişyarîyê muhîmî kerdî.
Psîkolojîyê înan xira beno
Guldîkenî va ‘şîddet bi rayîrê rêzefîlman seba domanan beno çîyêko normal’ û wina dewam kerd: “Welatê ke sey Tirkîya de domanî ser mîlîtarîzm ra yenî rêxistinkerdiş. Wextê AKPyî de şîddet her ke şî zêde bî û no şîddet bin nameyê qehremanî de kanalanê televîzyonan de yeno weşênayîş. Domanê ke nê şîddetî vînenî ci teqlît kenî. Reyna nê domanan de beno ke problemê cîddîyî bêrî cuyayîş. Ma qiseykerdişê Serekkomar û sîyasetmedaran yê Meclîsî zî vînenî. Welato ke sîyasetmedarê înan wina hereket kenî de psîkolojîyê domanan şima bifikirîyênê.”