Vanî ya, seserra 21. seserra kurdan a. Rojawayê Kurdistanê nimûneyê nayî yo. Wexto ke Rojhelatê Mîyanên kewt têmîyan, hesabê dewletan cîya cîya bi. Têmîyanbîyayîşê Surîye de zî hina hesabê cîya cîya bibî. Dewleta tirk vatênê, ma nêverdenê Rojawayê Kurdistanî de statuyeke bivirazîyo. Vatênê ma Bakurê Iraqî de şaşîye kerd la ma nêverdenê eynî şaşîye Bakurê Surîye de bibo. Ma nêverdenê, Kurdistanêk bîn Bakurê Surîye de awan bibo. Zewbî zî hedefê înan de rijnayîşê rejîme baasî yanî yê Beşar Esadî bibi. Tirkiyê hina lezkerdenê ke, A. Dawûtoglû vatênê ma çend saetan de resenê Şam û ma Şam de nimajê nêmrojî kenî.
Reyna hesabe dewleta tirk ser gaz û neft kendavê bibi. Gore hesabê înan rejîmê Beşar Esadî biamenê rijnayîş, o çaxî Îhvanê Muslîmîn ser Surîye û Rojawayê Kurdistanî de serwerîya xo viraştenê. Gaz û neftê Qatar û kendavî, ser Erebîstan, Urdin, Surîye, Rojawayê Kurdistan û Anatolîya ra derbasê Ewropa benê. Dewleta tirk zî bena dewlemend. Dewleta tirk qey seba nê çîyan DAÎŞ, El Nusra û Ahrar-î Şam înan rêxistinkerdî û şirawitî ser Rojawayê Kurdistanî.
Qatar û Sûîdî Erebîstan, qey û seba gaz û neftê xora xetêk biwirazênê û rehet bişirawênê Ewropa, pêrênê çeteyê ke Surîye û Rojawayê Kurdistanî de şerkerdênê, eyî çetê kerdî wayîrê pereyan. Telîs bi telîs pere dayî dewleta tirk. Pê gemî û teyaran sîleh derbasê dewleta tirk kerdî. Dewleta tirk zî pêronê nê sîlehan çeteyê xo şirawitî. Înan hina plan û hesabî viraştênê la vîrkerdbi ke şarê kurd se bikero... Şarê kurd xo dew bi dew, qeza bi qeza, bajar bi bajar rêxistin kerd. Hêzên YPG û YPJ, El Ekrad, QSD awankerdî. Şarê kurdî, şarê ereb û şarê bîn dayî kiştê xo hem hemberê dewleta dagîrker ya tirk hem zî çeteyanê aye şer kerd. Nika zî rizgarîya Reqqa nêzdî bîyo. Pêşengîya şarê kurdî de MSD û QSD, qey şarê Surîye û pêronê Rojhelatê Mîyanên bîyê modelê esasî.
Wexto ke hina bibi, hêzên YPG, YPJ û QSD serkewtî, planê dewleta tirk, Qeter û Erebîstana Suîdî înan xirab bîyê. Nika Erebîstana Suîdî hetêk de, dewleta tirk û Qeter hetêk de ye.
Îran zî bîyo şirîke dewleta tirk û Qeterî. Vanî, do ser Îranê zî operasyonêk bivirazîyo. Dima ra dore dewleta tirk zî bîyo. Gera şarê kurdî têmîyankewtişê ra nêkewro, tersêk. Têmîyankewtişê ra feyde û sûde ma estî. Îran de zî teşqelê bivirazîya zaf rind beno. U çaxî Rojhelatê Kurdistanê zî nêzdîyê azadîyê beno. Wa şarê kurd nişorû û duayan bikero. Vajo, Ya Homa! Îran de teşqeleyêk bibo. Kurdan ra zî roşnêk bivirazîyo. Ya Homa!Wa sey Rojavayê Kurdistanê dore bibo dore Rojhelate Kurdistanê.