Hetkara Hemserekîya Pêroyî ya HDPyî Aysel Tugluka ke 26ê kanûna 2016î de ameybî tepiştiş û 28ê kanûne de zî ameybî tewqîfkerdiş, Zîndanê Kandira de manena.
Îdîanameya Tugluke ameye amadekerdiş û goreyê îdîaname Tugluke do bi îdîaya ‘awankerdiş û îdarekerdişê rêxistina sucî’ bêra mehkemekerdiş. Na çarçewa de seba Tugluke 15 serrî ra heta 22 serrî û nîme cezaya zîndanî yena waştiş. Goreyê îdîanameya ke 117 rîpelan ra pê yena de awanbîyayîşê Kongreya Komelo Demokratîk (KCD) û hedefê ci estî. Mîyanê îdîaname de îlankerdişê xoserîye yê KCDyî, çalakîyê KCDyî û meclîs û xebatê komîsyonî yê KCDyî zî suc hesibîyayî. Reyna îdîaname de notê pêvînayîşî yê ke avûkatan Rayberê Şarê Kurdî Abdullah Ocalanî reyde kerdbîy zî estîy.
20 mîlyon merdimî Xoserîya Demokratîke wazenî
Sey ke yeno zanayîş Tugluke 7ê temmuze de vejîyaybî hakimî ver. Heyetê mehkeme seba Tugluke sînorê 3 avûkatan ardbîye û heqê pawitişî yê Tugluke asteng kerdbî. Tugluke o wext vatbî ‘ma sey KCDyî 10 serrî verê hetê Meclîsî ra ameybî dawetkerdiş. Labelê se bî ke 10 serrî ra pey KCD bî rêxistinêka îlegale?’û wina dewam kerdbî: “Xoserîya Demokratîke zaf cayanê dinya de netîce daybî û ewro 20 mîlyon merdimî zî na wazenî.”Mehkemeye o wext doze taloqê 8ê êlule kerdbî.
ANQARA