Komeleya Merdimê Kar û Endustrîvanê Kurdistanî (KURDSÎAD) ke 4ê nîsana 2014î de ameybî awankerdiş, seba ke tuzigê ci de nameyê Kurdistanî ameyo xebetnayîş bi îdîaya ‘Muxalefetîya Qanûnê Komeleyan kerdişî’ ameybî padayîş û Serekê Heyetê Îdareyî Abdulbakî Karadenîzî rê zî 10 aşmî ceza ameybî dayîş.
Nika zî sebebê cezadayîşî ame aşkerekerdiş. Sebebê qerarî de ca dîyayo pawitişo ke Karadenîzî mehkeme de kerdo. Sebebê qerarî de mehkeme dîyar kerdo ke vatişê Kurdistanî seba cîyakerdişî ameyo xebetnayîş û bale ancîyayo Kantonê Rojawanî ser. Mehkemeye vato vatişê Kantonê Rojawanî zî qala dewleta ke awankerdişê aye Sûrîye de yeno plankerdiş o.
Seke yeno zanayîş Karadenîzî pawitişê xo de qala qanûno bingeyî yê 1921 û 24î kerdo û wina vato: “Ê qanûno bingeyîyan de vatişê sey ‘Herêma Kurdistanî’, ‘Parlamenterê Kurdistanî’ estbî. Reyna raporo ke Erdoganî 1991 de amade kerdbî de ca dîyayo Kurdistanî. Çîyê ke tuzigî de ca girewtêne, çarçewaya azadîya îfadeyî de ca dîyayo înan.”
Cayêko winasî çin o
Heto bîn ra Mudurîya Komeleyan ya Walîtîya Amedî zî derheqê waştişnameyê KURDSÎADî de gerre kerdo. Netîceyê tehqîqatî de 1 serre ra heta 3 serrî cezaya hepsî ameye waştiş û ame waştiş ke wa komele bêro feshkerdiş. Dima ra ameyo tespîtkerdiş ke 7 cayanê tuzigî de vatişê Kurdistanî derbaz beno. Dozgerî zî wina îdîa kena: “Welatê ma de bi nameyê Kurdistanî de cayêkî çin o. Cayo ke tira Kurdistan yeno vatiş, Rojhelat û Başûrrojhelatê Welatî yê ke hetê PKKyî ra yenî namekerdiş î.”
MA/AMED