Operasyonê tepiştiş û tewqîfbîyayîşî bêmabên dewam kenî. Hema vaje her roje herême de polîsî erzenî keyeyan ser û xeylê kesan tepişenî yan zî tewqîf kenî.
9ê Tebaxe de Qezaya Rezanî ya Amedî de polîsan eştbi keyeyêkî ser de û bi nameyê Rabîa Akgune, mêrdeyê Rabîa Mehmet Emîn Akgune û Hayrîye Neslîhan Gozlugole tepiştbî. 3 kesî badê ke 5 rojî tepişte mendî, vizêr vîyayî dozgerîye û ameyî tewqîfbîyayene. 3 kesî bi îdîayê ‘endamê rêxistine bîyayene’ û ‘hetkarîya rêxistine kerdene’ ra tewqîf bîyî.
Dozgerîye derheqê 3 kesan de îfadeyê şahido nimite nîşan da û tewqîfbîyayîşê înan waşt. Reyna ame musayene ke wextê eştişê ser keyeyî de tayê mektûbî ameyî dîyayene û dozgerîye ê mektûban sey delîlî nîşan dayî. Mektûbê ke ameyî dîyayene, hetê birayê Rabîa Akgune Civan Boltanî ra ameyî erşawitene. Nê mektûbî hetê dozgerîye ra sey belgeyê rêxistinî ameyî nîşandayene.
MA/AMED