İstanika cebilxaneyan
19'ê aşma Çile yê 2014'î de, raya Adana û Ceyhan ser de, taynî TIR'î, hetê sawciyîna Adana vinderniyay bî. Vindernayinê nê TIR'an, zey derbe kewt riyê AKP ro û ci vistibi zehmetî û panikî. Bi ê panikî, serva-qandê serê biyayişî bigîrê, pêrokîn îmkanê dewlet seferber kerdî. La bado vejiyabi werte, ê TIR'î bi cebilxane û tifînganê giranî ra barkerdeyê. Ê cebilxaneyî û tifîngê giranî jî, serva çeteyanê DAIŞ û El Nûsra rişiyayê.
Rayveranê AKP sernî de vatibi, miyanê TIR'an de çina-kinc, werdiş û dermanê serva-qandê Tirkmenanê Suriye estê. Badê nê vatenan zî, derheqê dosya de qerarê miyanîkîn-nimiten girot, nêwaştî çiyê ke zerreyê TIR'an de yê, aşkere bibê.
Tersê Erdogan û AKP
Sersawci û wezîfedarê bîn ê ke TIR'an vindernay, pêrokînê ci wezîfera amey giroten. No refleksê reîs-cûmhûrê Tirk Tayîp Erdogan'î û rayveranê AKP damûsna ke, ê TIR'an miyan de çiyê talokeyî esto. Nayî ra kesê ke sirrê dewlet TIR'an deşifre kerdî zey xayin û ajanî hesibnayî. Erdogan û AKP her firsetî de, kesê ke qalê TIR'an kerdî, înan tehdît kerdî.
Delîlê hemkariya AKP-DAİŞ
Rojnameyê Cumhuriyet 29'ê Gulan'a 2015'î de dîmen û resîmanê sewqiyetê cebilxane yê TIR'an vet werte û weşîna. Vejya werte ke zerreyê TIR'an de hurendiya kinc, werdis û dermanî tifingê giran û cebilxaneyê herbî estbi. Badê na xeber Erdogan û AKP kewtî hereket. Enê
dîmen û fotografan piyakariya AKP û komanê çete rafîna ver çiman. Dîmenan de rind ayseno ke, tifîngê giranî miyanê koliyanê dermanî de rişiyenê Suriye.
Kolî-qaseyan miyan de,
- Hezar hewanî,
- Hezar guleyê hewan,
- 50 hezar fîşegî û 30 hezar fişegê tifinganê giran
Nê cebilxaney, teniya yê jew karwanî yê. AKP bi desan karwanê ewnayinî rîştî Suriye. Ê cebilxaneyê ke AKP rîştê zî, teslîmê komanê çete ê zey DAIŞ, Ahrar-ur Şam û El Nûsra biyê. Bi nê cebilxaneyan komanê çete, verikîn-sernî de Rojawa û xeylê cayanê Suriye de, êrişê şaranê sivîl kerdî, cenî û -domanqeçikan kiştî, ca û waranê sivîlan talan kerd.
Derheq dê 'Cumhuriyet' de dawa
Wexto ke rojnameyê Cumhurriyet'î enê dîmenan aşkere kerd û weşîna, Erdogan û sermiyanê AKP har bî, rojnameyê Cumhuriyet û gurekaranê ci kerd hedef. Erdogan'î bi xo, îdarekaranê rojnameyî Can Dundar û temsîlkarê Enqere Erdem Gul'î hedef girot, ferman da sawciyan, wast bikewo hereket. Hiqûqa Tirk zî goreyê fermana Erdogan'î hereket kerd û dawa akerd.
Can Dundar û Erdem Gul 26'ê Mijdar'î de serva îfade bidê şî sawciyîn û bado jî zey wastenê Erdogan'î, bi îdiayê îfşakerdenê sirrê dewlet û ajantî sewqê mehkema bî. Mehkema zî, goreyê wastena Erdogan'î qerar girot, Dundar û Gul tepişiyay.
Nûmayişê protestoyî
Badê qerarê tepiştenê Dundar û Gul'î yê mahkeme nêrazîbiyenî bî berz.
Cayanê zey Stenbol, Îzmîr û Enqera de nûmayişê protestoyî viraziyay. Stenbol de qerar, ver bana rojnameyê Cûmhûriyet yê Stenbol de, hetê hezarî kesan protesto bi. Hemseroka HDP Fîgen Yuksekdag zî serva paştdayin şî rojname. Yuksekdag va, ma dê destûr nêdê ke bi bêveng kerdişê çapemenî Tirkiye bikirêşê taritî. HDP, ÖDP, TCM û zewbîn xeylê partî û rêxistinan bi mesajan tepiştişê Dundar û Gul'î protesto kerdî.
NAVENDÊ XEBERAN