Bado ke Hemşaredarê Sûka Pîl yê Amedî Gultan Kişanak û Firat Anli amey binçimgirewtiş Amedijan zî verê xo day ver bana Şaredarî û wayîrê îradeyê xo vejyay. Amedijan tewrê xo damûsna û ardî zon ke iyê dê heta peynî pey îrade û qezenckerdenanê xo de vinderê. Kurdistanijan aşkere kerdî ke kerdenanê nika bi hewldayena derbeya 15ê Tîrmeh ra cîya nîyê.
Amedijî 3 rojîyo meydanan de waştena serbest veradayişê Hemşaredaranê xo Gultan Kişanak û Firat Anli kenê û xover danê. Senî ke xebera binçimgirewtişî yê Hemşaredaran vila bî Amedijan verê xo day ver bana Şaredarî û destpa nûmayiş kerdî. Rixmo ke bi desan qorî raştê hêrîşê polîsan amey zî, la fina zî dormeyê şaredarî terk nêkerdî. Quwetanê dewlet zey her qorî nêva cenîye, kalî yê, domanî yê bi hovane hêriş berd ser nûmayişkaran, erdî ra kaş kerd, girot bin çiman û derb kerd. La welatijan hêriş, binçimgirewtiş û merdiş girot ver çiman û kuçeyan terk nêkerd.
‘Tay mendo ke dê qeyûmî tayînê malbatan bikerê’
Ronişteyanê Amed ardî ziwan ke iyê dê heta peynî wayîrê îrade û erjayeyanê xo bivejyê û heta peynî xover bidê. Nûmayişkaran ra welatijo bi nameyê Recep Ûzût ke 57 serrî yo derbeya AKP rê nêrazîbîyen damûsna û da zonayen ke şarê Amed dûştê zilm û zorvajîye vejyayê kuçeyan. Ûzût vist vîrî ke Amedijî dê no zilmî qebûl nêkerê û wina va: “Tay mendo ke dewlet qeyûmî tayînê keyeyan bikero. Şarê Amed wayîrê îradeyê xo vejyeno. Hêrîşa dûştê îradeyê şarî zilm û serdestî yo.” Recep Ûzût veng da pêrokîn Kurdistanijan ke wayîrê îradeyê xo bivejyo.
‘Ma dûştê dehaqan vejyenê’
Welatijan ra Bekîr Korkmazî zî vist vîrî ke nê polîtîkayê letekerdişî yê û wina dewam kerd: “Ma dûştê dehaqan vejyayê. Ma dûştê dehaqan serreyê xo çewt nêkerd û ma dê dhuştê no zilmî serreyê xo çewt nêkerê. Korkmazî da zonayen ke kerdenanê ewro ke ser şarî rê ferz benê, kerdenanê hewldayena derbeya 15ê Tîrmeh ravêrnay.” Korkmazî aşkere kerd ke OHAL û qerarê OHALî zilm o û va ‘Ma xover danê û ma dê xoverdayişê xo biramnê.’ Nûmayişkar Yildiz Sûltan a 51 serrî zî ard ziwan ke wext wextê bêvengî nîyo û waşt ke herkes wayrê îradeyê xo bivejyo. Sûltan va ‘ma şaredarî û erjayenanê xo ra fek nêveradanê.
‘Ewro roj roja yewitî ya’
Teyfik Ayuzî zî ard ziwan ke bin nameyê têkoşîna dûştê "FETO" de kurdan kenê hedef û va,”Ma tekoşîna xo ra peyser gam nêerzenê. Nê kerdişî wehşî yê. Nê kerdenî nînê qebûlkerdiş. Iyê dê sernêkewê. Ma dê tekoşîna xo de serkewê.
Welatijan ra Nezîre Baran zî sereştiş, binçimgirewtiş û zextanê dewlet rê nêrazîbîyen damûsna û waşt ke şarê kurd dormeyê şaredarîye de are bibê. Baran va, ‘ewro roj roja yewitî ya. Ganî her kes wayirê îradeyê xo bivejyo. Ganî 7 ra heta 70î ma wayrê îradeyê xo bivejyê.
DÎHA /AMED