HDP vizêr Bakirkoy û Amed de mitîngê ‘Dûştê derbe xoverdayişê demokratîk’ viraşt û mesajê berzkerdişê tekoşîn da. Hemseroka DBP Sebahat Tûncel Bakirkoy de qisey kerd û da zonayen ke serbestîya Ocalan’î, ameyişê şaranê Tirkîye ya.
Des hezarî welatijî serva mitîngê ‘Dûştê derbe xoverdayişê demokratîk’ yê HDP Bazarê Şar yê Bakirkoy de amey pêhet. Mitîngî de xoverdayişê xorayirberdişî yê Kurdistan ame selamî kerden. Sehneyê mitîngî ra klamê bi lazkî, kurdî û tirkî vajhiyayî.
Serokê Komîteyê Hadreyîn yê Mîtîngî Felemez Erkan’î qiseyê akerdenî kerd û vist vîrî ke bi herb û rijnayiş çarekerdiş nêbeno û va, çarekerdiş mase yo. Peycoy hemserokê HDP yê Stenbol Aysel Guzel û Dogan Erbaş vejyay ser sehne ê şêligî selamî kerdî. Hemserokan aşkere kerdî ke dûştê derbe şarî dê serkewê.
Serva serokîn bi seyan welatijî merdî
Hemseroka DBP Sebahat Tûncel ke mitîngî de qisey kerd zî hayr ant kerdenanê faşîzan yê AKP ser û aşkere kerd ke ê serva ke dûştê derbe demokrasî bipawê îta de yê. Tûncel êrişê 5ê Hezîran yê Amedî zey êrişê dûştê demokrasî hesibna û wina va: “Bi êrişê bombeyîn yê 5ê Hezîran’î Tirkîye kirêştî pêvacoyekê newî mîyan. Pirsûs de, Enqera de ma çima bi seyan alwozê xo vinî kerdî? Serva ke Erdogan bibo serok ma bi seyan welatijê xo vinî kerdî. Dinya de yê ke dîktatorîya jew merdeyî hedef kenê merdişê şaran ra xemgîn nêbenê.”
Gune na îxtidar şiro
Tûncel vist vîrî ke weçînayişanê 1ê Mijdarî ra na het derbe ramena û wina dewam kerd:“Ma demokrasî û serbestîyan de israr kenê. Mesûlê herbî îxtidara AKP ya, Erdogan o. Nêşkenê ma bi tehiştiş û qetlîaman bitersnê. Ma zanê ê mahkemeyan de xo senî bipawime. Dosyeyhe ma yê tiriten û xespî çinî yê. Ma dê ti wext tekoşînê demokrasî û azadî ra fek nêviradê.”
Tûncel veng da pêrokîn şaran ke poşt bide Nisêbîn, Gever, Şirnex û Cizîr û wina va: “Jû hikûmeta ke vera şarê kurd, vera cenîyan, gurekaran herb ramena nêşkena haştî bîyaro. Nayî ra gune na îxtidar şiro. Na zî xoverdayiş hewce kena.” Sebehat Tûncel hayr ant serbestîya Rayverê Şarê Kurd Abdullah Ocalan’î ser û va, serbestîya Ocalan’î ameyişê şaranê Tirkîye ya. Ocalan nê, şarê Tirkîye bin tehdîtî de yê.
Gerek xoverdayişî berz bikerime
Hemserokê HDP Selahattîn Demîrtaş’î zî Mitîngê Bakirkoy’î de qisey kerd û hayr ant wedarnayişê heqê destnêdayişê parlamenteranê HDP ser û va ma mahkemekerdiş ra nêtersenê. Demîrtaş’î persa serokê dadgerîn ke çi çay are kerd do bişero ma mahkeme bikero? kerd û va, ma biewnîyê kam do kamî mahkeme bikero. Hemserokê HDP hayr ant herbê AKP yê Kurdistan ser û wina va: “Nisêbîn de, Gever de rijnayiş rameno. Yê ke quwetê ci estê wa şirê ewja. Bi Hurşît Kutler’î startê binçiman de vindî kerdişî day. Serva ke nê çîyî nêbê gerek ma xoverdayişî berzêr bikerê.
Înan vindî kerdî
Qiseykerdoxa HDK Gulîstan Koçyîgît zî hayr ant qedexeyanê mitîngan yê AKP ser û wina va: “Înan nê meydanan de vera şima vindî kerdî. “Ma alwozê Mehmet Tûnç, Sêvê, Fatmayanê. Domanê Dayika Taybet ê. No dewr dewro ke ma zaf xoverbidê yo. Dewrekê tarîxî yo. Ya ma dê xover bidê û serkewê, ya kî nê dê ma pêrokînan bikişê. Badê mitîngê Bakirkoy polîsan bi desan kesan girotî bin çiman.
Meydanê 5ê Hezîran de vîrarden
Amed de zî mitîngê ‘Dûştê derbe xoverdayişê demokratîk’ seatanê şan de virazîya. Verîya coy Meydanê 5ê Hezîranî ke par çeqînayiş bi de kesê ke weşîya xo kerdî vinî bi merasîmeke vîr amey. Ser waştişê Lîsa Çalan ke teqînayişî de hurdî lingê xo kerdî vinî postalê ci meydanî de ronay.
Parlamenterê HDP yê Amed Îdrîs Balûken’î vîrarden de qisey kerd û vist vîrî ke yê ke teqînayişê Amed, Pirsûs û Enqera viraştî eynî quwetî yê.
Mitîngê ‘Dûştê derbe xoverdayişê demokratîk’ zî seatanê şanî de destpa kerd.
DÎHA/STENBOL