Hikumatê AKP 7ê Hezîrane ra heta nika konseptê herbî yê gird da destpakerdiş û çarçoweyê no konseptî de bi deshezaran tanq, top û lejkeran hêrişê qeza û sûkanê Kurdistanî kerdî. Heta nîka zaf hûmarî de sîvîlan qetil kerdî. Nê kesan ra cenazeyê tayînan hona zî erdî de yê û malbatî nêşkenî cenazeyanê xo bigîrê. Şarê Kurd zî dustê nê hêriş û qetlîaman, her hetî ra xover dano.
Îşkenceyê vera cenazeyan wedarnê
Wekîlê HDP ê Amedî Nîmetullah Erdogmuş’î derheqê babedî de qisey kerd û vist vîrî ke 23ê Kanûne ra heta nikayo ke cenazeyî erdî de yê. Erdogmuş’î nayî zey “bêhiqûqî û bêedaletî bi name kerd û wina va: “Polîtîkayê ke hikûmeta AKP dana ramitiş, ti cayê dinya de nêameyo diyiş. Endî lazim o îşkenceyê ke ser cenazeyan de yeno kerdiş bêro wedartiş. Hem qetil kenî û hem zî nêverdanê şar cenazeyanê xo bigêro.
Polîtîkayê bêexlaqî
Erdogmuş’î da zonayene ke, bi no şiklî şarî rê zilm kenê û persa ‘Şima goreyê kamcî dînî cuyenî? kerd û wina va: “Fekê şima vano “ma misilman ê”. Kurayê misilmantî de îşkencekerdişê cenazeyan ameyo nuştiş. Nê polîtîkayê lêymin û bêexlaqî yê. Erdogmuş’î va, “Gune desinde îşkenceyo ke vera cenazeyan yeno ramiten peynî bibo û malbatî bişînbî cenazeyanê xo defîn bikerê.”
Bêvengmendiş piyakariya zilmî ya
Wekîlê HDP ê Amedî Nîmetullah Erdogmuş’î vist vîrî ke, ewro ê dekewtî rewşêke inasar ke, malbatî seba girewtişê cenazeyanê xo dekewnî grewa vêşanî û wina domna: “Bifikirê ke merdimî endî bi girewtişê cenazeyanê xo kêfweş benî. Çike ser cenazeyan îşkence yeno kerdiş. Erdogmuş’î ard ziwan ke, “Kesê ke merdiman qetil kenê û ser cenazeyan îşkence kenê, ê dê rojekê bîrê mahkemekerdiş û wina va: “Wa kes meraq nêkero. Do edalet rojekê cayê xo bivîno. Dustê no zilmî bêvengmendiş hemkarîya zilmî ya. Ez veng dana heme zana, şêx û meleyan ke, vera na zilmî bêveng nêmanî û werzê lingan ser.”
‘Waştişê haştî çiwext bîyo cîyakarî?’
Nîmetullah Erdogmuş’î qalîkerdişê xo de hayr ant hewildayenê akademîsyenan ser û vist vîrî ke, AKP endî nêzana ke se bikero û wina domna: “Serva ke herb vindero û merdimî nêmirê zaf cayanê dinya de roşnvîr, hunermend, rojnameger û akademîsyenî kampanyaya îmze dayê destpakerdiş, la Erdogan û AKP înan zey xayîn nîşan danê. Na meseleyêke wijdanî ya. Vejyayîşê dustê herbî wezîfeyê her merdimî yo û roşnvîrî zî wezîfeyê xo ya însanî anê ca. Erdogmuş’î vist vîrî ke, ‘Erdogan’î nê akademîsyenan zey ‘xayîn’ biname kerd û înan hedef damûsna. Erdogmuş’î Erdogan û AKP rê persa ‘waştişê haştî çiwext bîyo cîyakarî? kerd û wina va: Her roj doman, cenî, kal û pîrî yenîê qetilkerdiş û dustê nê qetlîaman bêvengmendiş çîyê ke însanî yo.
Erdogmuş’î peynî de va: “Verabidê wa însanî fikrê xo bi azad bîyarê ziwan. Ez no semedî ra bi zerrî ra paştî dana nê akademîsyenan.”
NAVENDÊ XEBERAN