Yewcaameyîş de kalûpîran dolme, îsot û balcanî senî yenê huşkkerdiş nîşanê ciwanan dayê. Mudirê Daîreyê Xizmetê Sosyalî Abdurrahman Karakoyûnî îzeh kerd ke pê na xebate êy wazenê edetê werdişî yê verîn newe ra mîyanê şarî de vila bikerî.
Beşa kalûpîran a ke girêdayîya Serekîya Daîreyê Xizmetê Sosyalî û Şaredarîya Şaristano Gird a Amedî sero xebatan kena semedê neqilkerdişê edeto kan aktîvîteyêk organîze kerd. Na aktîvîte Sumerparke de virazîya, kalûpîr û ciwanan pîya dolme, îsot û bîber huşk kerdî.
Îsotê ke zimistan semedê dolme yenê werdiş ewil ameyê vengkkerdiş û dima ra zî semedê huşkbîyayîş ameyê ravistiş. Çîyê ke yenê huşkkerdiş zî zimistan îkramê kalûpîran benê.
Mudirê Daîreyê Xizmetê Sosyalî Abdurrahman Karakoyûnî îzeh kerd ke êy wazenê nabênê kesê extîyar û ciwanan de dîyalogêk ronê û wina wat: “Seserra ke mîyanê kurdan de no edet esto. Şarê ma verî ra heta nika amnanan zerzewat û fêkîyan huşk keno û zimistan zî nînan weno. La nika no edet vera vera çîn beno. Ma xaye kenê wa no edet vinî nêbo.”
Wa bêro pawitiş Karakoyunî ard ziwan ke nika şaristan de çîyê ke yenê cemednayîş û çîyê GDOyîn yenê werdiş û qalîkerdişê xo wina peynî kerd: “Çîyê ke yenê werdiş zirar danê weşîya merdiman. Zemanêk vere cû pîlê ma mazemeyê xo amnan kerdênê huşk. Zebze û fêkî pê germîya tîje amênê huşkkerdiş. Mîyanê ê çîyan de madeyê kîmyasal çîn bî. Şarê ma no edetê xo heta roja ma pawito. Ma wazenê wa no edetê şarê ma dewam bikero. Ma semedê nê edet nêro vîrîkerdiş nê xebatan kenê.”
AMED