Avûkata Rayberê Şarê Kurdî Abdullah Ocalanî Newroz Uysale derheqê tecrîdî va ’20 serrî yo Birêz Ocalan Îmrali de xover dano’ û wina va: “Tecrîdî ra dima şerê Kurdistanî zî hîra bi. Nika halê kaosî esto û destûr nêdîyeno ke ti xebere Îmrali ra bêro. Labelê êdî azadîya Ocalanî mecbûrî ya.” Mizrakliyî zî da zanayene ke ganî tecrîd bêro wedarnayene.
Rayberê Şarê Kurdî Abdullah Ocalan 27ê Temmuza 2011î ra nata bi mehneyanê ‘keştîye xirabe ya’, ‘muxalefetê hewayî’ û ‘OHAL’ ver nêşêno avûkatanê xo reyde pêvînayîşan bikero. Reyna Ocalan Êlula 2016î ra nata nêşêno keyeyê xo reyde û 2015î ra nata zî nêşêno Heyetê Îmrali reyde pêvînayîşan bikero. Tecrîd bi serran o dewam keno û dezgeyê mîyanneteweyî zî vera tecrîdî de bêveng o.
Avûkatanê Ocalanî ra Newroz Uysale û Parlamenterê HDPyî yê Amedî Selçuk Mizrakliyî tecrîdî ser o qisey kerdî û bale antî azadîya Ocalanî ser. Uysale va ‘ma bi serran o Îmrali ra ti xebere nêgênî’ û wina dewam kerde: “Ma zîndano ke xebere nêgênî, nêşênî avûkatîya xo bikerî û sewbîna raştîyan reyde têrî yî. Birêz Abdullah Ocalan zî 20 serrî yo ewja de xover dano û hewl dano cuya xo bidomno. Ma kewtî serra 8. ya pêvînayîş nêkerdişî.”
Uysale dewamê qiseykerdişê xo de wina va: “Hetê meslegê avûkatîye de tecrîdêko winasî qet ti cayê dinya de nêameyo dîyayene. Zîndanê Îmrali de seba ke pêvînayîşî nêrî kerdene, hertim dewleta tirkî tayê mehneyan nîşan dana. Nê mehneyî hetê dewleta tirkî ra tim yenî ziwan û nê mehneyî hetê dezgeyanê mîyanneteweyîyan ra yenî qebul kerdene. Wexto ke OHAL ame îlan kerdene, ewil têkilîya Îmrali ame birnayene. Ma vera nê madeyî de muracatê Mehkemeya Qanûnê bingeyî kerd û rewşe resnaye CPT.”
Uysale va ‘ewro heme muracatê ma hetê ti dezgeyan ra bi hawayo cîddî nînî dîyayene’ û wina dewam kerde: “Tecrîdî ra dima şerê Kurdistanî zî hîra bi. Nika halê kaosî esto û destûr nêdîyeno ke ti xebere Îmrali ra bêro. Wexto ke ma muracatê dezgeyanê mîyanneteweyîyan kenî, muracatê ma bêrî goşdarî kerdene daxî, seba ke babete Ocalan a, vindetişê tayê dezgeyan bedilîyeno. Wa herkes muracatê tayê cayan bikerî ke na rewşe derbaz bibo. Ma herkesî dawetê muracatkerdişî kenî. Êdî Azadîya Ocalanî mucbûrî ya.”
MERKEZÊ XEBERAN
Ganî tecrîd bêro wedarnayene
Parlamenterê HDPyî yê Amedî Mizrakliyî zî dîyar kerd ke ganî tecrîd bêro wedarnayene û wina va: “Eke welatêk de rewşa aştî û çareserîye bibo, o wext şima eşkenî ê welatî de bextewarîya komelî pê bîyarî. Ocalan eşkeno welat û Rojhelato Mîyanên de aştîye awan bikero û şima kesêko winasî 3 serrî yo binê tecrîdî de tepişenî. Cayê nêyî çi huqûq de çi zî merdimîye de çin o. Donemê peyênan de polîtîkayê şerî hakim bîyî. Eke lazimîya ma bi hêvîye esta, o wext ganî polîtîkayê şerî biqêdyî. Lazimîya ma bi çareserî, aştîye û temînatî esta.”