Karanê teberî ra wezîfedar Hetkarê Hemserekîya HDPyî Hişyar Ozsoyî derheqê operasyonê artêşa Tirkî ya vera Başûrî de va ‘no tena vera PKKyî de nê, heme Kurdan de beno’ û wina domna: “Çîyê ke vizêr Efrîn de kerdî, hewl danî ewro Başûr de bikerî. Efrîn de çi bo, Başûr de zî rewşe a ya.”
BERÎVAN ALTAN / MA / ANQARA
Artêşa Tirkî 27ê Gulane de vera herêma Bradostî ya Başûrê Kurdîstanî de operasyonêko bi nameyê ‘Pençe’ dabi destpêkerdene. Wezîrîya Pawitişê Mîllî îzehetêk da û dîyar kerd ke nameyê operasyonî ‘Operasyonê Pençe -2’ ameyo hîrakerdene.
Reyna mîyanê hewteyî de Serekkomarê Îraqî, Serekwezîr û Serekê Herêma Kurdîstanî Tirkîya zîyaret kerdî. Dima ra Heyetê Ewleyîya Îraqî ra heyetêk Tirkîya de tayê pêvînayîşî kerdî. Averşîyayîşanê herême ser o karanê teberî ra wezîfedar Hetkarê Hemserekîya HDPyî Hişyar Ozsoyî qisey kerd.
Ozsoyî qala operasyonê artêşa Tirkî yê vera Başûrê Kurdîstanî de kerde û wina va: “No operasyonêko zaf hîra yo. Tîya de tena îdareyê Bexda nê, Îdareyê Herêma Kurdîstanî ra zî tayê kesî destek danî operasyon. Tirkîya 1980 ra nata bi operasyonanê teberê sînorî nizdîyê problemê Kurdî bena. Labelê nêşêna netîce bigîra. Cok ra problem hîna gird bîyo.”
Eşkera yo ke peymane esta
Ozsoyî bale ant zîyaretê îdarekaranê Başûrî yê Tirkîya ser û wina va: “Xora nê zîyaretî operasyon ra qerfîyaye nîyî. Înan reyde pêvînayîşan kenî. Ma nêzanî ke îttîfaqê senînî ameyî viraştene. Labelê tena Bexda ra nê, yê ke Erbîl ra yenî ra zî îstîxbaratan gênî. Herçiqas ke Meclîsê Kurdîstan û Îraqî de vera operasyonan de tayê rexneyî yenî kerdene zî, hukmat tayê pêkerdişî kerdî. Xeylê armancê Tirkîya estî. Tirkîya wazena estena xo ya Başûrî mende bikera. Reyna wazena Şengal û Rojawan de zî wina bikera.”
Bi bombardûmanî problem çareser nêbeno
Ozsoyî va ‘Tirkîya heme qezencanê Kurdan seba xo sey tehdîtî vînena’ û wina dewam kerd: “Heta nika Tirkîya çîyo ke waşt Rojawan de nêşêna bikero, nika zî hewl dana Başûr ser ro şêro û Rojawan bigîro binê kontrolê xo. Na rewşe tena vera PKKyî de nîna kerdene. Tirkîya îdareyê Başûrî zî seba xo tehluke vînena. Eke Tirkîya Başûr de bica bibo, dima ra do mudaxaleyê karê zereyî yê Başûrî zî bikero. No zî nîşan dano ke nê hêrişî parçeyê projeyêko hîra yî. Eke siba Kurdê Îranî zî tayê qezencan fînî xo dest, do hêrişê ewja zî bêro kerdene. Ewro bi bombardûman û vengkerdişê dewan, problemê Kurdan çareser nêbeno. Çîyê ke vizêr Efrîn de kerdî, hewl danî ewro Başûr de bikerî. Efrîn de çi bo, Başûr de zî rewşe a ya.”
Feydeyê birakiştişî kesî rê çin o
Ozsoyî tewirê Îdareyê Herêma Kurdîstanî rexne kerd û wina va: “Hukmatê Başûrî herinda ke îttîfaqê neteweyî xurt bikero, Tirkîya reyde hemkarîye kena. No nîno famkerdene. Verê cu zî amebi ceribnayene. Ewro Kurdî îttîfaqê neteweyî pawenî. Verê cu hêzanê Başûrî reyde şerê ‘birakiştiş’î amebî kerdene. Ganî tesilî na ra dûrî bêro vindetene. Çimkî feydeyê birakiştişî ti kesî rê çin o. Reyna meseleya S-400î Rojawan ra cîya nîya. Têkilîya Tirkîya û Amerîka xeripîyaya û Tirkîya nika sînor de tayê sewqîyatan kena û hemleyêk dayo destpêkerdene. Tirkîya wazena bikewa mabênê Kobanê û Qamişlo û ewja de bimana. Eke bişînbo destekê Rûsya bigîro, do çîyêko winasî bikero.”
Bê Kurdan Rojhelato Mîyanênêk mumkin nîyo
Ozsoyî da zanayene ke bê Kurdan Rojhelato Mîyanênêk mumkin nîyo û wina qedêna: “Êdî wina bîyo ke Îran, Sûrîye, Îraq û Tirkîya de problemê Kurdî bi hawayo cîddî yeno munaqeşekerdene. Mîyanê 5-6 serranê peyênan de Sûr ra heta Cizîrî, Kerkûk ra heta Efrînî ca nêmend ke hêriş bikerî. Cok ra çîyo ke bêro kerdene o yo ke ganî vera nînan de yewîya Kurdan bêro awankerdene. Reyna ganî Kurdî şaranê bînan dir zî têkilîyanê xo aver bîşêrî. Ma Rojawan de nimuneya Hêzê Demokratîke yê Sûrîye dî. Mesela tena cuya Kurdan nîya. Ganî şaranê bînan reyde têkilîyî aver şêrî. Ganî firsend nêdîyo yê ke wazenî Kurdan vera yewbînan de bidî şuxilnayene. Ganî ti kes mîyanê Kurdan de nakokî awan nêkero. Yê ke bikero, do hetê tarîxî ra nêro efûkerdene.”