Nobeta Wijdan û Edaletî ke hetê HDPyî ra dîyaybî destpêkerdiş, roja 25. de dewam kena. Nobeta ke Amed de dest pêkerdbîye, Stenbol, Wan û nika zî bajarê Îzmîrî de Parka Gundogdu de dewam kena.
Babete ser o Wekîlê Hemserekî yê Grûba HDPyî Ahmet Yildirimî qisey kerd. Yildirimî va ‘nobete roja 25. de dewam kena’ û wina dewam kerd: “Wexto ke ma na nobete plan kerd, ma vatênê do tena parlamenterî ca bigîrî. Ma nobeta Amedî de dîy ke sîstem zaf terseno û ma texmîn nêkerdbî ke do hende biterso. Ma zanayênê do bitersî, labelê ma hende texmîn nêkerdbî.”
Yildirimî bi vîrardişê kesê ke Erdlerzê Marmara de merdbîy dest bi qiseykerdişê xo kerd û wina va: “Ma hîna zî erdlerzî reyde cuyayîşî nêmusayî û hîna zî nêşênî şarê xo vera afetanê tebîîyan de bipawî. No îqtîdar kurayê cuye ra biewnîyo pere vîneno, çimkî zîhnîyetê înan zîhnîyetê rantî yo. Nika plankerdişê zereyî yê Îzmîrî destê îdarekaranê herême ra ameyo girewtiş. Goreyê ma seba Îzmîrî îdarekarîya herême zaf muhîm a. Eke şima nînan rê verdî, bêxera sermaye ti planê înan çin o. AKP mîadê xo pirr kerdo û îqtîdarê xo bi şer domneno. Wexto ke 7ê Hezîrane de îqtîdarî vînî kerdî, kaos vetî. Serekwezîr Bînalî Yildirimî vatbî ‘400 parlamenteran bidê û kaos ra rizgar bibênê’.”
AKP şêro dayîkî nêbermenî
Yildirimî dewamê qiseykerdişê xo de va ‘êdî tehamulê ti kesî seba cuyayîşê dejî çin o’ û wina domna: “Serekkomar vano ‘eke AKP vînî bikero do Tirkîya vînî bikera’. Labelê eke AKP îqtîdar ra bikewo, welat de başî bena. Eke AKP îqtîdar ra dûrî bibo, heme çî hîna rind beno û dayîkî êdî nêbermenî. Reyna eke AKP şêro welat de gulî akenî. Estena û çinêbîyayîşê AKP mîyanê kaos û huzirî de tercîh o.”
Ferzkerdîşê faşîzmî yo
Yildirimî qiseykerdişê xo de bale ante ferzkerdişê cilê tek tîpî ser û wina dewam kerd: “Şima eşkenî kesê ke zîhnîyetê şima de yî rê cilanê tek tîpan bidî xoradayîş, labelê hepsîyê azadî xoranêdanî. Çi suc kerdo wa bikero, cilê tek tîp îşkence yo û ferzkerdişê faşîzmî yo. Şima îlhamê xo kura ra gênî?”
Yildirimî tewr peynî qala teqnayîşê ke Heskîf de benî zî kerd û wina va: “Ganî şima tarîxêk qurbanê projeyêkê enerjîyî bikerî. No zîhnîyetêko talanker o.”
DÎHABER/ÎZMÎR