BERÎVAN ALTAN / MA/ANQARA
Meclîsê Temsîlkaran ê Kongreya Amerîka de çend rojî verê raydayîşêk ame viraştene û zafaneyê parlamenteranê Meclîsî projeyê qanûnan yê vera Tirkîya de reya ‘ya’ da. Meclîs de 403 parlamenteran va ‘ya’. Labelê zelal nîyo ka Trump yan zî Senato derheqê Tirkîya de çîyêk bikero yan nê.
Babete ser o Hetkarê Hemserekîya Pêroyî yê HDPyî Hişyar Ozsoyo ke Têkilîyanê Teberî ra berpirsîyar o, qisey kerd. Ozsoyî dîyar kerd ke hêrişan ver Komarperwer û Demokratê Amerîka ameyî têhet û her di hetî na babete de bîyî yewe û wina va: “No muhîm o. 3 ra 2ê Kongre qerar girewt, eke 3 ra 2ê Senato zî qerar bigîro, o wext heqê redkerdişê Serekî destê ci ra yeno girewtene. Eke wina bibo o wext Trump nêşêno bivindarno.”
Ozsoyî da zanayene ke Trumpî ser o zextê girdî estî û wina va: “Trump nêwazeno ke vera Tirkîya de qerarêk bêro girewtene. Heta meseleya S-400î de zî Trumpî destûr nêda ke vera Tirkîya de çîyêk bêro kerdene. Ganî o wext tayê çîyî biameyêne kerdene, labelê Trumpî nêkerd. Hetta dagîrkerîya Rojawanî de Rûsya reyde destek da Tirkîya. Amerîka de vera Trumpî de reaksîyonê girdî estî.”
Ma milkê Erdoganî deşifre bikerî
Ozsoyî qala milkê keyeyê Erdoganî kerde û wina va: “Projeyê qanûnan yê Amerîka de derheqê milkê keyeyê Erdoganî de raporêk ameyo amadekerdene. Ma nêzanî destê Amerîka de çi melumatî estî. Dîyar o ke sîyasetmedarî wazenî vajî ‘destê ma de tayê melumatî estî û ma milkê Erdoganî deşîfre bikerî’. Ê wazenî ke vajî eke ti wina dewam bikerî, ma tayê cayanê bînan de zî cigêrayîşan bikerî.”
Ozsoyî derheqê vatişê Erdoganî yê ‘Ganî Kobanê bikewo binê kontrolê ma’ de zî wina va: “Eke Erdogan hêrişê Kbanê bikero, beno ke no pêl hîna gird bibo. Beno ke Erdogan û Trump binê nê pêlî de bimanî. Eke Erdogan û Trump derheqê Vakur û Rojhelatê Sûrîyde tepîya gaman bierzî, beno ke çîyêko winasî nêbo.”