Siyasetvanê Tirk ke kewtî tenge vanê “ya Xizir!”
Zovîna Xizir era xo vîrî nêanê. Roza hîraye de Xizir nasnêkenê.
Onca spekulasyonan kenê vila. Vanê “ma wazeme mesela halbikerîme.”
Onca rojnamevananê xo kenê dewre, hemkarkeranê xo kenê dewre. Wazenê xo bi nî spekulasyonan na tenge ra bixelesnê.
Emser zimistan destê xo de çi ke bî verva gerîllayan ard kar. Qazê kîmyasalî verva domonanê Kurdan ardî kar, domonê Kurdî qetil kerdî.
A roze vatenê “hata demêdê kilm ma nînan ra xeleşîme.” A roze vatenê “ma nînan de qesey nêkeme, o sene qese wo!”
Ewro gerîlla helme ci nêdena. Ko de, dewe de, deste de gerîlla hen dana piro ke, çikî çimanê nînan ra perenê. Tenga henene derê ke, nêzonenê se bikerê.
Coka onca zurûpolan kenê vilake, tene waxt qezenc bikerê, bêrê ra xo ser. Eke ameyî xo ser tabî onca Xizir xo vîra kenê.
Polîtîka xo yê Suriye de teyna mendî. Bi polîtîka xo yê Iraq de ginay binê linaganê Haşîmî ro.
Verecoy nînan Iraq tehdît kerdenê, nika Iraq Tirkiye tehdît keno. Par Îran lewê Tirkiye de bî û hurdemînê wastenê, fênda Kurdan fênda tamîlan kerê, ewro Tirkiye Îran rê biya dismen. Ge îranizî siyasetvananê Tirkî vêrê çever de verdanê, ge siyasetvanê Tirkî îranizan vêrê çever de verdanê, cirê çever ranêkenê.
Par wastenê Suriye de muxalîfanê Esad bixelesnê, Suriye serbest kerê, ewro Kurdê rojavayî xoseriya xo ya demokratrîk înşa kenê, Tirkiye rê biyê “saredez.”
Waxtêde Kurdanê başur ra vatenê “nî postalan lêsenê” nika endî siyasetvanê Tirkî postalanê siyasetvananê Kurdanê başur lêsenê.
Nêwastenê Kurdî caye de serbest be, başur ra dima rojava ame, baKurde gerîlla taye hereman qontrol kena.
Nika tam tenge derê tornê osmanizan. Onca xeberanê boyînan kenê vila.
Hama roza yeniye serokiya konseyê raye ra berdene yê KCK ra jû eskerakerdîs ame. Eskerakerdîs de vajîno ke, “nî vatîsê hukumatê Tirkî rast niyê, hamlade taktîki ya. Mavênê hukumate Tirkî û hereketê ma de seweta diyayîsan diyalog çîno.”
Mesela na wa: Hukumat hem veyvik a, hem zama wo, hem bervî ya, hem dawilçî, hem zurnaçî yo. Bi xo dowil cineno bi xo kaykeno. Seweta kayê xo yê qilêrînî mara çepikan wazeno.
Xezika jû hukamatode Tirk bibiyenê, na mesela bi haştiye halbikerdeê, ma zî cirê çepik pirodenê!

***
Endî beso! Nika tam waxt o: Sazî, dezge û rêxistinê ma gune endî Tirkî weşiya xora vezê. Rojnamê ma gune pelganê Tirkî kêmkerê, televziyonê ma programanê Tirkî kêmkerê, siyasetvanê ma eskerakerdîsan bi zonanê Kurdistanî bide.