Endamê Komîteya Merkezî yê PKKyî Muzaffer Ayatayî derheqê tewqîfkerdişê parlamenteran, hêrişê topyekunî yê hukmatê AKPyî û rewşa Tirkîya ya Rojhelato Mîyanên de qisey kerd.
Ayatayî dîyar kerd ke AKP rewşa derbe xebetneno û lez dayo polîtîkayanê dij-derbe û qiseykerdişê xo de va AKPyî şaredarîyê ke waştêne bi Qerarnameyê Hukmê Qanûnî xesp kerd û tewr peynî zî parlamenteran eşt hepisxaneyan.
AKP temsîlkarê neteweya serdest o
Ayatayî dewamê qiseykerdişê xo de va AKP vano ‘ma qerar girewto ke tevgerê kurdan û hêzê demokrasîye bipelçiqnî. Kam vejîyo duştê ma, ma do hêzê dewlete nîşanê ci biderî. Ma dewlete yî, ma îqtîdar î, ma qanûn î, ma temsîlkarê neteweya serdest î.’ û qiseykerdişê xo wina domna: “Ti hêvîya AKPyî seba lîberal û kurdan nêmenda. Coka AKP wazeno înan bi zorî qezenc bikero. Bi pelçiqnayîşê tevgerê kurdî dest bi kar kerdî. Seba nêyî zî bajaran veşnayî, bi seyan merdiman ziqaqan de kiştî û dest ronayî mal û milkê înan ser o.”
Aqûbetê Tirkîya baş nîyo
Ayatayî qiseykerdişê xo de bale ant ser aqûbetê AKPyî û wina va: “Wina aseno ke rewşa asena de AKP bi weçînayîş nêşono û no zî êdî zelal bîyo. Yeno famkerdiş ke CHP nêşkeno bi weçînayîşan AKPyî bivindarno. Ya CHP do beşdarê cepheyêka demokratîke bibo û vernîya AKPyî bigîro, ya zî AKP do goreyê zerrîya xo CHPyî bixebetno. AKP vernîya weçînayîşê 7ê hezîrane de vatêne ‘eke ma îqtîdar nêbî, Tirkîya de aramî û ewleyî nêmanena’ la weçînayîş ra dima Tirkîya de ewleyî nêvirazîya. Xora ewleyîya welatêk bi tedbîrê polîsan nêbena. Eke ti şarî sey dişmenî biveynî û şarî ser de şêrî, o wext do vera to de xoverdayîş bibo. Veradê ewleyîye nika Tirkîya de rewşa nêewleyîye esta. Sûrîye û Îraq de kewtî şerî mîyan la aqûbetê înan dîyar nîyo.”
Qanûnê Kenan Evrenî zî qîmê Erdoganî nêkenî
Ayata qiseykerdişê xo de va ‘êdî qanûnê Kenan Evrenî zî qîmê Erdoganî nêkenî û qiseykerdişê xo wina domna: “Weçînayîşê 7ê hezîrane de ame famkerdiş ke AKP şert û mercê demokratîke de netîceyêk baş nêgeno û tersê nêyî AKPyî girewto. AKP kewto rewşêka winasî ke ya do bi zor bimano, ya zî bi zor şêro. Sîstemê Serektî zî zextêk o, çimkî Tirkîya de çi sîstemê serektî yê sey Amerîka û çi zî sey Fransa yeno waştiş. Tirkîya de sîstemêk unîter yanî sey Saddamî yeno waştiş. Tirkîya de heme cîyayî sey dişmen yenî vînayîş.
Derdê ci teber de verdayîşê ma yo
Ayatayî derheqê operasyonê Mûsil û Reqa de wina va: “Problemê xeylê têmîyankewte estî; hem hêzanê herême eleqeder kenî û hem zî hêzê mîyaneteweyî tede yî. Rewşa ke her tim bedilîyena, esta. Derdê Tirkîya teber de verdayîşê kurdan o. Yanî Tirkîya hem Sûrîye de û hem zî Îraq de wazena bi hawayo aktîf beşdar biba û kurdan teber de verada. Wazena vernîya awanbîyayîşê kurdan bigîra û nê semedî ra hîna zaf sûnîyan vejena aver. Seba ke na rewşe Îraq de ameye dîyayîş, nêwaştî ke Tirkîyaye beşdar bikerî. Estena Tirkîya ya Başûr de meşrû nîya, çimkî hukmatê Îraqî qebûl nêkerd. Tirkîya bi zorî kewte mîyanê welatêk xerîb. Tirkîya vana ‘hukmatê verêne destûr dayo ma’ la hukmatê nikayîn destûr nêdano. No rey zî tirkmenan kena mehne û vana ‘PDK destûr dano’ La belê hêzê PDKyî çin o ke hêzêk leşkerî yê xerîb bîyaro, bideko mîyanê herra Îraqî.”
Tirkîya amadekarîya hêrişî kena
Ayatayî va Tirkîya eynî wextî de amadekarîyan kena ke hêrişê herêmanê Qendîl û Behdînan bikera û wina dewam kerd: “Îxtîmal esto ke hêriş zî bikero; xora mîyanê Tirkîya de şerêko giran esto, reyna Tirkîya kewta mîyanê Sûrîye û hende hêz zî Îraq de ameyo cakerdene. Tirkîya her cepheyî de hawayo topyekun hêrişê kurdan kena. Tirkîya wazena nê krîz û kaosî ra bi no hawa feyde bivîna.”
Problemê kurdan yewîye yo
Ayatayî peynîya qiseykerdişê xo de qalê çareserîye zî kerd û va: “Rewşa ke esta de problemê tewr pîl nêbîyayîşê yewîya kurdan a. Sey Tevger ma na raştîye vînenî. Rojhelato Mîyanên newe ra yeno dîzaynkerdiş. Firsendêk winasî reyna nêkeweno destê kurdan. Kurd her çar parçeyan de bîyî hêz û xeylê sazîyê çapemenî û weşanî awan kerdî û bi hezaran kadroyê ke eşkenî karê polîtîk bikerî, resnayî. Problemê kurdan yê tewr gird, yewîya kurdan a. Eke rêxistinê kurdan çar parçeyan de biresî yewbînan, kurdî do qezenc bikerî.”
ERSÎN ÇELÎK / AGÎT BÊZAR / ANF / BEHDÎNAN