Nuştoxê kitabê bi nameyê ‘Kurdistanê Sûrîye de şer û şoriş: Analîz û Vengê Rojawanî ra’ û Unîversîteyê Vîyana de Antropologê Kulturî Thomas Schmîdîngerî derheqê averşîyayîşê Rojawanî de qisey kerd. Schmîdîngerî va ‘Goreyê 2014 par mektebê ke Rojawanî de yî derbazî kontrolê kurdan bîyî û ziwanê perwerdeyî bîyo kurdî’ û qiseykerdişê xo wina domna: “Pêroyîya Rojawanî de hema vaje tesîrê rejîmê Sûrîye nêmendo. Çimkî kurdan Rojawan de bi hawayo fîîlî sîstemêk awan kerdo û eşkenî erdê Rojawanî kontrol bikerî. Heto bîn ra hetê ke teberê kurdan de yî zî beşdarê sîstemê xo kerdî.
Polîtîkaya Tirkîye têk şîye
Schmîdîngerî dewamê qiseykerdişê xo de wina va: “Beşdarnêbîyayîşê HSDyî yê Kombîyayîşê Astana girêdayeyê polîtîkaya Tirkîya yo. Tirkîya vernîya pêresayîşê Kantonanê Efrîn û Kobanê de astengî viraşte. No seba Rojawanî problemêko gird o. Labelê Tirkîya nêşîna hetê mîyanneteweyî de Rojawanî îzole bikera. Hewl dayî bikerî la sernêkewtî. Çimkî ti projeyê ke bê HSD sernêkewenî.”
Kurdî vera kurdan de yî
Schmîdîngerî peynîya qiseykerdişê xo de dîyar kerd ke ‘kurdî şerê cîhanî yê 1. ra nata donemê xo yo tewr qewetin cuyenî’ û wina qedêna: “Labelê cîyayîya mîyanê xo ver zeyîf î. Kurdî vera kurdan de yî û no zî nîşan dano ke kurdî yewîye ra hîna dûrî yî. Tirkîya partîyêka kurdan vera kurdan de xebetnena. Şam zî eşkeno nêyî bikero. No çîyêko tehlukeyin o. Eke kurdî nêbî yewe beno ke heme çîyê xo vînî bikerî.”
SELAMÎ ASLAN / DÎHABER / ENQERA