Îqtîdarê AKPyî 19ê Temuze de şaredarîyê Amed, Wan û Mêrdînî xesp kerdî û herinda hemşaredaran de qayûmî tayîn kerdî. Xespbîyayîşê şaredarîyan ra dima sere de Amed, Wan û Mêrdînî de çalakîyê protestoyî yenî viraştene û çalakîyê Nobeta Demokrasî dewam kenî.
Cinî, doman, extîyar û xeylê hetan ra kesî nê çalakîyan de cayê xo gênî û çalakîyan de tewr zaf Dayîkê Dolbendspîyî bale ancenê. Nê dayîkanê ke beşdarê çalakîyan benî ra yewe zî Dayîka Aklîme Hanase ya. Hanase wextê grevê vêşanîye yê vera tecrîdê Rayberê Şarê Kurdî Abdullah Ocalanî de zî her çalakîye de cayê xo girewtêne.
Aklîme Hanase serra 1993 de zext û tedayanê dewlete ver mecbûr manena ke dewa xo Karwazî ra bivejîyo û dewa aye ameya veşnayene. Dima ra Hanase keyeyê xo bar kerdo û ameya Sûrê Amedî. Aye roje ra nata keyeyê xo reyde Sûr de ciwîyena. Hanase dayîka şeş domanan a û nika taxa Şehîtlîkî ya Yenîşehîrî de manena.
Ma do heta çi wext bêveng bimanê?
Hanase dîyar kerd ke qayûmî beranê şaredarîye pê bend û dêsan girewto û wina domna: “Mabênê 5 aşmanê peyênan de şarê Amedî xizmet dî û berê şaredarîye şarî rê akerde bî. Wextê HDPyî de şaredarîye şarî rê abî. Nika dormeyê şaredarîye ameyî girewtene û merdim nêşkeno bendan ra bivîyaro û şêro şaredarîye. Ma do heta çi wext bêveng bimanê? Eke ma vera qayûman bêveng bimanê, ê do siba qayûm tayînê keyeyanê ma zî bikerê. Qesebaya mi veşena. Ez seba heqê xo tîya de ya. Ez do heta peynîye heqanê xo bigêra. Ez dizd nîya, mi dest nêna heqê çewî ser. Ganî çew vera dizdan û destsernayîşan de bêveng nêmano.”
AMED