Hukmatê AKPyî her cayê Kurdistanî rantî rê akerdo û bi no hawayo hewl dano polîtîkaya koçkerdişî bidomno. Şirnex, Cizîr, Gever, Nisêbîn, Heskîf û Sûr ra dima nika zî Taxa Fîskaya ke girêdayeyê qezaya Yenîşehîrî ya Amedî ya de amadekarîya rijnayîşî keno.
Taxa Fîskaya têkoşînê kurdan de wayîrê cayêko muhîm o û sey cîranê Çemê Dîcle û Bexçeyê Hevselî yeno zanayîş. Qerarê îstîmlaqkerdişê Taxê 18ê tebaxe de Rojnameyo Fermî de ame weşênayîş.
Kesê ke Fîskaya de ronîşenî, zafane serranê 90î de netîceyê veşayîşê dewanê xo de vera xo dayî tîya. Hîna zaf Licê, Çewlig û Sêrt ra vera xo dayî na taxe. 2 serrî yo ke polîsî bi wesayîtanê zirxinan hewl danî taxijan bitersnî û teslîm bigîrî.
Cinîyê taxe qisey kerdî û vera îstîmlaqkerdişî de reaksîyon nîşan dayî.
Ma nêwazenî reyna koç bikerî
Cinîyê taxe dîyar kerdî ke ê do vera polîtîkayanê koç û tedayan de xover bidî û keyeyê xo ra nêvejyî. Cinîyê ke sereyê her ziqaqî de kom bîyî, wina vatî: “Heta nika ti teblîgatêk ma rê nêameyo û ma tena qerar rojname de dîyo. Ma nêwazenî yewna rey serranê 90î bicuyî. Demo peyên de wesayîtê zirxinî dewrîye erzenî û heqaretê ma kenî. Ma taxa xo de cuya zîndanî cuyenî. Seba ke ma vera Sûrî de bêveng mendî, dore ameye ma. Eke ma tîya de zî bêveng bimanî, o wext do heme Amed bibedilnî. Ma do vera rijnayîşan de xover bidî.”
AMED