Fermandarê Pêroyî yê Hêzê Sûrîyeya Demokratîke Mazlum Ebdîyî da zanayene ke eke ê beşdarê prosesê çareserîye nêbê, ê do netîceyê ke vejîyenî zî qebul nêkerî û wina va: “Eke çareserîye yena waştene, ganî temsîlkarê na herême zî beşdar bibê.”

Fermandarê Pêroyî yê Hêzê Sûrîyeya Demokratîke (QSD) Mazlûm Ebdî beşdarê programê televîzyonî bi û derheqê rewşa peyêne ya Vakur û Rojhelatê Sûrîye de qisey kerd û vînayîşê xo pare kerd.

Fermandar Ebdîyî dîyar kerd ke Serekkomarê Tirkan Erdogan Kombîyayîşo Pêroyî yê Neteweyê Yewbîyayeyî de bi qiseykerdişê xo eşkera kerd ke o wazeno Vakur û Rojhelatê Sûrîye dagîr bikero û wina dewam kerd: “Aşkere yo ke planêko vurnayîşê nufûsî yo, planê dagîrkerdişî yo. Ne ma, ne şarê Sûrîye û ne zî hêzê mîyanneteweyî eşkenî nê planî qebul bikerî. Şarê Vakur û Rojhelatê Sûrîye firsend nêdanê nê planî. Çîyêko xeyalî yo ke kesan bîyarê nê herêman û bi înan bajaran, dewan saz bikerê. Qet pratîk de zî çîyêko winasî do nêro kerdene.”

Ebdîyî qiseykerdişê xo de qala hetê Tirkîya ra bikarardişê bextwaştoxan kerde û wina domna: “Êyê ke ma qebul kene, pêroyê bextwaştoxan, çi Tirkîya de çi zî cayanê bînan de yê. Herkes eşkeno biagêro keyeyê xo. Do destek zî înan rê bêro dayene. Tîya de teyna şertêk esto; êyê ke agêrenê eke vera şarî de sucêk kerdî, do derheqê înan de tehqîqat bêro akerdene û ê do bêrî mehkemekerdene.”

Mekanîzmaya asayîşî ya sînorî xebitîyena

Fermandarê Pêroyî yê Hezanê Sûrîyeya Demokratîke Ebdîyî dewamê qiseykerdişê xo de wina va: “Mekanîzmaya Ewleyîya Sînorî pêameyîşêk a û mabênê Amerîka û Tirkîya, Amerîka û QSDyî de ameya viraştene. Ganî hîrê prosesê mekanîzma estbê. Heta nika ti problem nêvejîya. Bi nameyê QSDyî ma heta nika berpirsîyarîyê xo ardî ca. Çarçewaya ameye mojnayene de dest pêkerd û dewam keno. Seba netîcegirewtişî tay wext lazim o.”

Mumkin nîyo ke ser bikewa

Ebdîyî bale ante Komîteya Qanûnê Bingeyênî ya ke hetê Sekretero Peroyî yê Neteweyê Yewbîyayeyî ra ameye aşkerekerdene ser û wina va: “Na komîteya ke Anqara de hetê Tirkîya, Îran û Rûsya ra ameya awankerdene şaşîyêka girde ya. Tena Kurdî nê, Ereb, Tirkmen, Suryanî û sewbîna xeylê şarî teberê na komîte de ameyî verdayene. Xebatêka temsîlkarê şaran ê Vakur û Rojakewtene tewrê ci nêbîyî, mumkîn nîyo ke ser bikewa. Ma bawer kenê ke tedayanê dewleta Tirkî ra bi nê hewayî bîyo. Piştîdayoxanê sazkerdişê komîte zî qebul kerdo. Na zî şaşîtîyêka girde ya.”

‘Eke temsîlkarê ma beşdar nêbê, ma do red bikerê’

Ebdîyî qiseykerdişê xo de qala nika ra pey çîyê ke do bikerî zî kerde û wina va: “Eke temsîlkar û parçeyê na herême tewrê prosesê çareserîye nêbê, ma do netîceyê ke vejîyenê zî qebul nêkerê. Ma do her netîce ke ci ra bivejîyo red bikerê. Coka hirê ra yewê Sûrîye do red bikerê û no kar bênetîce bimano. Eke çareserîye yena waştene, şert o ke temsîlkarê na herême heme beşdar bibê. Şert o ke Qanûnê Bingeyênî yo ke do bêro amadekerdene goreyê waştişê şaranê na herême amade bibo.”

 

ANF / BRUKSEL