ZEYNEP DURGUT / JINNEWS / COLEMÊRG
Ewropa de xeylê welatanê bînan de bikarardişê darûyanê kîmyewîyan ameyo qedexekerdene, labelê Tirkîya de hîna no het de çîyêk nêameyo kerdene. Cok ra hingî her ke şono hûmara înan kêmî bena.
Hingê ke cuye de cayê înan zaf muhîm o, probleman ver mirenî. Problemê ke bajarbîyayîş û sewbîna ver vejîyenî, zaf zirar danî hing û kêzikanê perinan. Bitaybetî Colemêrg de wextê qedexeyan de bikarardişê darûyanê kîmyewîyan ver, bi hezaran hingî merdî û emser hingimên zî zaf tay o. Babete ser o Hatayî Demîra ke hingdarî kena, qisey kerde.
Demîre va ‘serranê peyênan de bi hezaran hing û sewbîna kêzikî merdî’ û wina dewam kerde. “Kêzikê perini tebîet de çîyanê zaf muhîman kenî. Cok ra mergê înan zaf zirar dano cuye. Emser bi hezaran hingî merdî. Eke hingî çin bibî, seke Albert Eînsteînî vato ‘4 serrî emrê merdiman maneno’. Hingêk eşkeno emrê merdimîye bi seyan serrî derg bikero. Hende hêzê ci esto. No probleme heme merdimîye yo. Ganî ma vera nê texrîbatan de bivinderî.”