Sîyasetmedarê Kurdan Mihemed Emîn Pênciwênî derheqê hêrişanê dewleta Tirkî yê vera Başûrê Kurdîstanî de qisey kerd û qala bêvengîya hukmatanê Başûrî û Îraqî kerd. Pênciwênîyî va ‘dewleta Tirkî seba ke Başûr dagîr bikero, sewqîyat virazena’ û wina domna: “Dewleta tirk reya ewile no nêkena. Labelê na reye sebeb PKK nîyo. Seba ke Îraq parçe bibo, hêriş kena. Tirkîya wazena ke Îraq de mende biba. Wina kena ke eke Îraq seba Kurdan çîyêk kerd, mudaxale bikero.”
Pênciwênîyî da zanayene ke hukmatê Îraqî pawitişê xoserîye ra mesuldar o û wina va: “Dewleta tirkî bi hêrişanê xo xoserîya Başûrê Kurdîstanî zî îxlal kena. Hêrişê mal û milkê şarî kena. Wezîfeyê hukmatê Başûrî o yo ke gere wayîrê mal û milkê şarî bivejîyo. Labelê hukmat îzehetêko merdim ci ra şerm bikero, da. Eke vera hêrişan de bi hawayo cîddî nêvinderî, tarîx barêko giran milê înan ser o ronano.”
Pênciwênîyî tewr peynî qala peymanê ke mabênê Tirkîya, Îran, Îraq û Sûrîye de benî kerde û wina va: “Nê peymanî goreyê çaresernêbîyayîşê probleman benî. Ê nêwazenî ke Başûr de problemê Kurdan çareser nêbo. Eke werte de peymanêk çin a, o wext hukmat çira vera hêrişanê Tirkan de bêveng manena?” n ROJNEWS / SILÊMANÎ