Rayberê Şarê Kurdî Abdullah Ocalanî 2ê Gulane de bi mabênkarîya avûkatanê xo mesajê muhîmî dabî. Verfekê PYDyî Salih Muslîmî mesajê Ocalanî ser o wina va: “Ma hêvî kenî ke ê sey vatişê Birêz Ocalanî waştişanê ma rê rêz bigîrî. Eke wina bibo ma do hîna asan pê bikerî.”

Rayberê Şarê Kurdî Abdullah Ocalanî 2ê Gulane de bi mabênkarîya avûkatanê xo mesajêk dabî. Ocalanî mesajê xo de vatbi “Ma bawer kenî ke problemê Sûrîye çarçewaya Hêzê Sûrîyeya Demokratîke (QSD) de pêrodayîşan ra durî de bêrî çareserkerdene û bi perspektîfêko demokratîk hal bibî. Ganî na çarçewa de hesasîyetê Tirkîya zî bêrî esasgirewtene.”

Babete ser o Verfekê Partîya Yewîya Demokratîke (PYD) Salih Muslîmî qisey kerd. Muslîmî va ‘mesajê Ocalanî nîşanê ma da ke ma rayîrê raşt de yî’ û wina dewam kerd: “Fikrê ke no het de estî, seba ma zaf erjin î. Ma hewl danî çîyê ke Ocalanî vatî, ma pratîze bikerî. Coka ma hewl danî statuyê xo bikerî fermî. Ma zaf bedelî dayî û ma fek erdanê xo ra veranêdanî. Birêz Ocalanî nîşanê ma da ke ma rayîro raşt de yî. Nêyî moral da ma.”

Muslîmî bale ant hesasîyetanê Tirkîya ser û wina va: “Ma qarmîşê karê zereyî yê Tirkîya nêbî. Ma zî hesasîyetanê Tirkîya rê rêz gênî, ma qet seba Tirkîya nêbî tehdît. Labelê çeteyê ke hêrişê ma kerdî, hertim ser Tirkîya ra derbazê vakurê Sûrîye bîyî. Dewleta tirkî bi heme vatişanê xo hewl dana sîstemê ma terorîze bikera. Ma hêvî kenî ke ê zî sey vatişê Birêz Ocalanî waştişanê ma rê rêz bigîrî. Eke wina bibo, ma hîna asan pê kenî. Eke dîyalog bibo tîya de hewayêko bîyaye vejîyeno orte.”

Ganî tecrîd wedarîyo û pêvînayîşî dest pêbikerî

Hemserekê HDPyî Sezaî Temellîyî zî mesajê Ocalanî ser o va ‘şima nêşênî wina ercan nizdîyê mesajanê Ocalanî bibî’ û wina domna: “Goreyê mi mesajê Ocalanî de çîyo tewr muhîm o yo ke bale ancîyaya prosesê 2013î ser. Ocalan mesajê xo de qala muzakereya aştîye do senî bêro awankerdene zî keno. Reyna wendişê Ocalanî yê Rojawanî zî ser esasê komara demokratîke yo. Wexto ke merdim hetê pêroyî de ewnîyeno, Ocalan qala kêmanîyan keno û raşta zî nê zaf muhîm î. Mesajê Ocalanî seba 2013î dawetname yo. Ganî tecrîd demêko raver bêro wedarnayene û pêvînayîşî dest pêbikerî.”

Do nê xoverdayîşî netîce bigîrî

Sîyasetmedaranê kurdan ra Mihemed Emîn Pênciwênîyî zî va ‘avûkatan saya xoverdayîşê çalakwananê grevê vêşanîye de şêna pêvînayîş bikerî û wina dewam kerd: “Çalakîyan rojeva dinya de veng da, coka pêvînayîş bi. Ocalanî mesajê xo de agêrayîşê prosesê 2013î kerd. Ez bawer kena ke no zî do sîyasetê Rojhelatê Mîyanênî û Tirkîya ser o tesîr bikero. Sere de Amerîka, Ewropa û herkes fam kerd ke yê ke aştîye nêwazena Tirkîya bi xo ya. Grevê vêşanîye vilayê heme cayan bîyî. Eke şehadetî bibî, Tirkîya rê bedelêko giran bivejîyo. Çîyo ke keweno milê ma o yo ke ganî ma wezîfeyo ke keweno milê ma ser, bikerî. Nê xoverdayîşî do netîce bigîrî.”

 

AMED