SELMAN GUZELYUZ /DÎREN YÛRTSEVER / MA / ANQARA
Hetkarê Hemserekîya HDPyî Alîcan Onlu ke rêxistinkerdişî ra berpirsîyar o, derheqê xerîtaya HDPyî, tayînkerdişê qayûman û tecrîdê Îmrali de qisey kerd. Onluyî dîyar kerd ke eke tecrîd nêwedarîyo, o wext do xespî dewam bikerî û da zanayene ke eke wina bibo Tirkîya demokratîke nêbena û aştîyêka rûmetine zî nêbena.
Onluyî va ‘tecrîdê Îmrali bi çend pêvînayîşan nêwedarîyeno’ û wina dewam kerd: “Ganî bi hawayo sistematik pêvînayîşî bibî û aqlê dewlete bikewo merîyet. Seba ke nê xespkerdişê nêresî şaredarîyanê bînan ganî tecrîd bêro wedarnayene. Ma kêmanîya 1ê Teşrîna peyêne ra derse girewta. Nika îqtîdar eynî çîyan ceribneno, labelê wa bêro zanayene ke ê nêşênî eynî netîce bigirî.”
Onluyî qala tedbîrê ke girewtî ser o vindet û wina va: “Ma weçînayîşê 31ê Adare ra ver îxtîmalê tayînbîyayîşê qayûman de tedbîrî girewtbî. Ma dîyar kerdbi ke ê çiqas bigîrî zî ma do tepîya bigîrî. Ma wina kerd ke zemînê têkoşînê hêzê demokrasî hîra bikerî û ma nêyî ra va Rayîro Hîrêyin. Îqtîdar hewl da ke HDP tena biverdo, labelê nika îqtîdar tena mend. Ma nika seba 1ê Êlule Roja Aştîye ya Dinya amadekarîyan kenî. Heta ke ma qezenç bikerî, têkoşîn do dewam bikero.”
Îzehet bîyaye yo, la kêm o
Onluyî qiseykerdişê xo de qala îzehetê CHPyî kerde û wina va: “CHPyî hetê dezgehî de reya sifteyîne randevû da HDP. No bes nêbo zî bîyaye yo. Goreyê ma îzehetî nêşênî xespan bivindarnî. Ganî ma alternatîfê îqtîdarî ronî. Kam ke tekperestîya AKP û MHPyî ra bêzar bîyo, ma eşkenî ci reyde îttîfaq bikerî. Labelê îxtîmalê xespbîyayîşê şaredarîyanê CHPyî zî esto. Eke ma nînan tepîya bigîrî, o wext ma eşkenî vernîya xespbîyayîşan bigirî.”