Pisporê Rojhelatê Mîyanênî Mustafa Pekozî averşîyayîşanê herême ser o dîyar kerd ke Amerîka bi ti hawayî Minbicî ser o Tirkîya reyde bazarî nêkena wina va: “Eke Minbic ser o tehdîdê Erdoganî bidomyî, o wext do şer derbazê Elbabî bibo û Tirkîya do nêşênbo estena xo bipawa.”

 

SELMAN GUZELYUZ / MA / ANQARA

Çend rojî verê rahîbê amerîkayij Andrew Brunson serbest ame veradayene û dima ra Serekkomar Erdoganî qiseykerdişê xo de bale ant vera Sûrîye de operasyon kerdene ser û qala bazarîya xo ya Minbicî kerdbî.

Pisporê Rojhelatê Mîyanênî Mustafa Pekozî zî nê babetan ser o qisey kerd û melumatê muhîmî dayî. Pekozî va ‘rewşa Minbicî de ti bedilîyayîş çin a’ û wina domna: “Xora verê cû Amerîka û Hêzê Sûrîyeya Demokratîke (HSD) pîya aşkere kerdbî ke YPG ewja ra ancîyayo û Minbic kontrolê HSDyî de yo. Sînorê Minbicî ser o zî Amerîka û Rûsya estî. Na rewşe hîna zî wina ya.”

Pekozî dîyar kerd ke Erdoganî serbest veradîyayîşê rahîbî ra dima qala operasyonê rojhelatê Firatî kerd û no qiseykerdiş ra dima persê ‘gelo verba Brunsonî de Minbic yeno dayene?’ yenî kerdene û wina va: “Labelê Trumpî îzehetêk da û dîyar kerd ke înan bi ti hawayî Tirkîya reyde bazarîye nêkerda. Tîya de beno ke Tirkîya hewl dana rewşa rahîbî ser o çîyêko winasî bikera. Çimkî Trumpî bi hawayo zelal vato ‘esîran ser ro bazarî nêbena’. Rahîb 10 serrî zî zindan de bimano, Amerîka Minbic ser o bazarî nêkeno. Îdlîb de şîyayîş goreyê waştişê Tirkîya nîyo û Tirkîya zaf teng bîya. Seba ke bala herkesî vila bikera, vana; Ma do bikewî Minbic.”

 

Rûsya wazena nakokîyan kûr bikera

Pekozî dewamê qiseykerdişê xo de wina va: “Tirkîya vana qey ser çeteyan ra eşkena Amerîka û Fransa tehdît bikera. Tîya de mesela bedilnayîşê nûfisî ra muhîmêr a. Erdogan hewl dano ke Amerîka tepîya game bierzo. Eke Tirkîya gamêka winasî bierza, o wext Minbic nê, Elbab beno warê şerî. Eke Erdogan tehdîdanê xo bidomno, o wext do Elbab de hakimîya xo vînî bikero. Rûsya wina nîşan dana ke seke destek dana Tirkîya û bi no qeyde mesaj dana Amerîka, Fransa û kurdan. Rûsya bi no hawa hewl dana mabênê Tirkîya û Amerîka, Tirkîya û Fransa, Tirkîya û NATO de nakokîyan kûr bikera. Rûsya Tirkîyaye ser ro mesaj dana Amerîka û bi no qeyde zî wazena kurdan ser o zextê ‘vatişanê Şamî qebul bikerê’ bikera.”

 

Bê peymane çareser nêbeno

Pekozî da zanayene ke raştîya xo de Rûsya zî bi hawayo baş zana ke no nêbeno. Pekozî qiseykerdişê xo wina domna: “Rûsya zî zana ke heta ke problemê kurdan çareser nêbo, Sûrîye de îstîkrar nêbeno. Ez bawer nêkena ke Rûsya kurdan bigîro qarşîyê xo. Rûsya zana ke eke kurdan reyde peymanêka dîplomatîke nêviraza, nêşêna îstîkrarî awan bikera. Heta aye baş zana ke eke wina nêkero, cayê ke tede ya zî vînî kena. Rûsya eynî wext de Îdareyê Şamî ser o zextê xoserîye dayena kurdan kena. Eynî çî seba Esadî zî derbazdar o.”

 

Ganî tayê herêmî bibî xoser

Pekozî qiseykerdişê xo de va ‘Sûrîye êdî sey verên nêşêna biba dewleta unîtere’ û wina qedêna: “Nika ra pey ewja de ancax sîstemê xoserîye yeno awan kerdene. Êdî wina bîyo ke ganî Sûrîye de tayê herêmî bibî xoser. Na babete de Amerîka û Rûsya munaqeşe nêkenî. Îngilistan, Fransa, Almanya, Rûsya û Amerîka zî na babete de pê kerda. Na nuqta ra peyser agêrayene nêbeno. Çîyêko winasî ancax bi temamî bedilîyayîşê polîtîkaya Amerîka û Yewîya Ewropa mumkin o. Eke Rûsya Îdlîb û Elbabî Tirkîya ra bigîro û teslîmê Sûrîye bikero, o wext do Tirkîya ra vajo ‘karê to qedîya’ û wina bikero ke Tirkîyaye bido zorî ke wa kurdan reyde ronîşo. Çimkî Rûsyaye na babete de Amerîka reyde peymanêk viraşto. Xora statuyê Rojawanî ameyo dîyar kerdene, tena hetê Milletê Yewbîyayeyî ra girîyayîşê ci yê binê temînatî mendo.”